要產品喺大陸賣個滿堂紅，少啲噱頭都唔得!好似最叻搞宣傳嘅霸王集團（1338），佢哋就有一team成8000幾人嘅銷售隊伍，專門負責去舖頭向顧客推銷洗頭水，而呢班大部份都係女人嘅銷售團隊，有個好有氣勢嘅稱號，叫做「霸王花」，真係嚇你唔死都笑死!
除咗「霸王花」之外，賣童裝嘅新股博士蛙（1698）都興呢家嘢！有老友爆料，博士蛙舖頭裏面嘅Sales哥哥同姐姐，原來並唔係普通人嚟o架，事關佢哋有個稱號，叫做「超級博士蛙戰士」！
不過，要成為「超級博士蛙戰士」並唔係咁容易，因為公司係會按每季嘅銷售表現，評選出邊位「幸運兒」，可以得到呢個榮譽，仲會有獎金同埋證書，希望激勵吓大家爭取表現……咁最好表現嗰位，唔知又會唔會再有個特別嘅名稱呢?
李華華