食家Ｌ講食經，甚有研究，今期《香港文學》有一篇中大博士生寫嘅文章，詳細論述香港飲食文化及食評，就以相當篇幅講及食家Ｌ。左丁山識佢多年，只在飯局相遇，從未領教過佢嘅產品。呢日食家Ｌ來電，約埋幾位老友到佢嘅清風街「留家廚房」食飛機餐。飛機餐？有冇搞錯，如果係食美資航空公司嘅飛機餐，就咪預我。食家Ｌ話：「國泰商務艙飛機餐呀，我設計嘅！」
哦，國泰航空飛機餐，係靚一啲嘅，比好多航空公司好好多，但係仍有不足之處，就係機上靠焗爐將食物焗番熱，唔多唔少失去原汁原味。但食家Ｌ在「留家廚房」炮製地面上嘅「飛機餐」，當然唔同講法。
如時去到清風街，行入「留家廚房」，夥計立即帶左丁山上一樓，一樓有大露台，擺咗兩張飯枱，咦，唔係enclosedarea喎，一啲朋友志在在大廳食飯，唔駛落街在街邊「補粉」。各位老友記齊集之後，食家Ｌ大講文人逸事，風趣笑話，大家嘻嘻哈哈，嘈到震天之餘想起食家Ｌ係中大新亞書院藝術系畢業生（一九八四），同年同學有英文系何安達，財務系關百豪，新聞系黃麗君、游淑儀，人類學系張志剛，社會系羅永生等等。但睇落食家Ｌ嘅年齡比佢地大好多喎，點解？食家Ｌo架o架笑話：「我兩位阿哥分別讀男拔、喇沙，細妹讀女拔，但我就讀咗八間小學先至畢業，中學讀唔上，根本冇文憑。二十幾歲之後，有人叫我以成年學生（maturestudent）身份申請中大，我帶埋我在《中國學生周報》及其他報刊發表嘅文章，膽粗粗去申請中大中文系，記得見過一位蒙傳銘先生，結果收咗我讀中文系，一年後我發覺自己鍾意藝術，得高美慶教授批准轉系，畢業後留在中大讀碩士，論文導師就係饒公。」哦，原來如此，食家Ｌ都算打破傳統，中學未畢業就可以入中大，讀埋碩士㖭，唔怪得佢有時又寫埋畫評藝評，得罪過唔少人。呢晚佢嘅食客之一，有蔣芸大姐，講到最近面世之林風眠舊作，兩人意見不同，一言一語，我地唯恐天下不亂，從旁推波助瀾，好不熱鬧。