現在歌曲多是情情塔塔，難令人留下深刻印象。以前填詞人憑豐富人生經歷寫詞，訊息正面，經數十年洗禮依然膾炙人口，所以幾時都說，八十前聽眾是有福的。
記者：林佩婷
攝影：周旭文、譚盈傑、部份相片由受訪者提供
場地：帝京酒店帝京軒（22626161）、麗豪酒店仙吧（21321231）、大眾書局（27731509）
詞風簡樸 宣揚正面訊息
鄭國江，填詞作品估計達三千，創作過《漣漪》、《分分鐘需要你》、《熱咖啡》等名曲，題材靈活多變，但歌詞基調只有一樣，就是表達正確思想。「以前唱片係商業產物，但我兼顧得好好，大家都畀好大自由度我。填詞最緊要忠於自己感受，人哋寫高山流水好，我寫自己熟識題材更得心應手。1965年我開始教書，教咗三十年，我避開唔想寫嘅歌詞或內容，自己詞風較簡樸，太複雜諗唔到，多數填積極正面有希望嘅歌詞，《信》、《漣漪》、《泥路上》等等都可以代表我人生觀。」
教書生涯不算忙碌，讓他有機會發掘自己興趣如畫畫、書法，更跑到電視台做兒童節目編劇、參與綜藝節目，「我對音樂節奏、音律天份唔高，但填嘅詞都叫充份表達到意思。當年做過唔同綜藝節目，將台灣歌歌詞改編成廣東歌，好似《山南山北走一回》，反應好好，之後返TVB做歌唱話劇，由汪明荃、鄭少秋、譚炳文演出，超受歡迎。後來，蔡和平搵我幫手搞《視聽蔡和平》，叫我改編英文歌畀關正傑唱，再後來，我幫麗風唱片公司，正式用本地編曲配詞，記得係1974年，第一首歌係劉鳳屏嘅《一串淚珠》。」
雖說當年創作自由度大，但某些歌詞或旋律還是有所限制，「我重填鱷魚恤首廣告歌，DJ話因為係廣告歌所以唔播得，你睇吓黎明年代廣告歌《那有一天不想你》幾Hit？寫畀張衞健首《新的轉機》，其中一句我填『張國榮當初也是無名小子』，但唱片公司捧緊佢，所以要改，『張國榮』改成『世界的偉人』。我當然介意，但都要了解環境，好好磨合製作程序。有時係歌星發唔到某個音，又或者詞組出現問題，改詞快啲搞掂就算，堅持唔改盞出唔到唱片！」
填詞填到喊
八九十年代，他名曲眾多，印象深刻的歌詞多不勝數，「《法外情》插曲原名《誰令我停步》，後改為《記憶中漫步》，睇到電影故事內容講孤兒院，我好感觸，寫咗『每次見兒伴父母行，難自禁常停步』一句，寫到凌晨三點都喊，覺得表達好好，諗住呢首歌會紅，點知出到嚟反應唔及《獨自去偷歡》。」九十年代尾，他開始淡出，閒時和太太學畫畫寫書法，近年零星填過《香港心》、《愛》等，將填詞任務交棒給下一代。
1980年他開填詞班，發覺學生沒大出路便沒再教，近年再執教鞭。「前兩年網絡歌《他約我去迪士尼》爆紅，多咗平台畀大家發表作品，加上浸會陳戴禮博士同區瑞強『音樂農莊』嘅誠意邀請，我就開班。填詞係創作，無得教，但錯誤可以避免，某地方嘅沙石可以剔走，同時可以指點正能量、正面題材，唔似市面上咁多濫觴題材。好似最近玉樹地震、菲律賓拯救人質失敗等事件，學生都可以拎嚟做題材，唔單止填詞，仲會推出專集同搞發佈會，令學生有發表機會。」對於有志做填詞人的人，他有以下忠告。「填詞班學生唔止有年輕人，最令我感動係有的士司機，遠至住離島、天水圍嘅學生都嚟上堂。八十後想入詞壇，首先千萬唔好諗住入行，因為唱片業步入低潮期，喺網上發表，多啲聽眾都算好事，填詞人可以諗住自己志向去寫詞，好似有學生寫咗首《宅男心曲》，由父母同仔一齊唱，好戲劇化，區瑞強電台節目都播過出街，多正面訊息就好。」
柴可夫司機的鬼才
若說鄭國江填詞簡約正面，被劉天賜喻為「前有古人，後面來者」的黎彼得（Peter）就可算鬼才，他的詞，不但有基層聲音，連愛情、時事、民生等都有涉獵，偏偏他學歷不高。9歲在母親報紙檔幫手，日日看書培養出良好文學修養，「我學歷得小五，喺報攤最鍾意睇《武俠世界》，唔識咪查字典問人囉，我阿叔係靚次伯，細個鍾意聽粵曲，耳濡目染下對寫詞有幫助。」他做過OfficeBoy、私人司機，一次徵文比賽發掘了他的創作天份。「無聊參加報紙《我的父親》徵文，9歲老竇死咗記得幾多吖，咪靠創作，點知得到季軍。跟住分別喺《年青人周報》、《新知日報》同《音樂一周》寫稿，嗰陣仲做緊司機，筆名都叫柴可夫司機。」
當年他的專欄多寫民間疾苦，用詞口語化，他在專欄裏改編過一首加價歌，譚炳文在《歡樂今宵》都唱過，轟動一時，造就他日與許冠傑的合作，「有日放低架車食飯，遇到Sam，佢問我點解寫加價歌，仲拎埋我電話方便聯絡。有日佢打畀我話：『Peter，不如你試寫幾隻字睇吓。』就係咁，我寫咗『難分真與假，人面多險詐，幾許有共享榮華，簷畔水滴不分差。』幾句，嗰刻對世界悲觀，窮人手停口停無理想，我好感嘆，Sam即時拎結他彈音樂，」之後兩人相約廟街食蜆，見鐵絲網掛了「命裏有時終須有、命裏無時莫強求」語句，將之融入歌詞，成為名曲《浪子心聲》。
兩人合作不斷，創作《打雀英雄傳》、《十個女仔》、《尖沙嘴Suzie》等名曲，之後在Sam介紹下加入嘉禾做編劇，1978年替TVB寫了首台歌，於金唱片頒獎禮和顧家煇一起頒獎，更奠定他填詞人地位。對於填詞，他有兩個大原則。「寫歌詞最好一韻到底，令首歌更順，呢啲係職業良心，要Draw到人Attention，一嘢要中。所以歌名最好同歌詞第一句一樣，好似《十個女仔》、《梨渦淺笑》等。麻雀歌我都寫咗兩首，唔知點解無人寫到第三首，好多人鍾意我嘅歌，但同時又好多人不屑，講真咁對我唔公平。我填過二百幾首歌，有一半係情歌或其他內容，例如《印象》，可能市場無第二個填到呢啲歌啦，證明到自己能人所不能。」
其後，他常和黎小田合作，亦踏足廣告界，《餐餐蠔油李錦記》和把PizzaHut譯作「必勝客」都出自他手，歌曲產量約二百多首。江山代有人才出，淡出後他近年只技癢出手，例如替子華填《你大晒》，用短短兩小時填好《七十二家租客》嘅主題曲，劉德華上月也唱回他三十多年前填詞的《人辦》。對於八十後想加入詞壇，他的答案很啜核：「以前市場有雞有蛋，家雞死晒無蛋，淨係Download唔買唱片。想填詞？唔使諗，無市場。」
