外號為「扮嘢祖」嘅網壇「2哥」塞爾維亞球手迪祖高域，一向鍾意喺球場上做出搞鬼動作，使球迷捧腹大笑。中網賽男單決賽周日因天雨改期，但「扮嘢祖」亦笑對天雨，搞笑咁扮工作人員幫手掃雨水，揮舞毛巾猶如變咗「鬥牛武士」威風凜凜，而佢周一喺「補賽」，以2:0擊敗西班牙嘅費拿成功衞冕，賽後訪問時仲大呼「我愛中國」，真係玩轉北京。
成功衞冕中網賽
23歲嘅迪祖高域早年憑扮演俄羅斯美女舒拉寶娃、西班牙嘅拿度打波，成為網絡紅人；佢喺場上熱情投入嘅打法，都係佢獲得中國、以至世界各地球迷熱愛嘅原因。佢今季後半年亦過得美滿，皆因佢喺美網奪亞軍、助塞爾維亞首贏台維斯盃；今次中網賽挫費拿成功衞冕，亦鎖定11月年終賽嘅資格。
「扮嘢祖」喺奪冠後接受訪問時，大談佢嘅人生觀，他話：「我總係想搞笑，喺生活中尋找笑料，因網球運動需要球員全情投入，偶爾放鬆係一件好事。」迪祖所講嘅生活中尋笑料，就係如周日連場天雨時，佢喺場館做完熱身拉筋動作後，就同教練人員玩樂一番，3人齊齊拍膊頭齊跳「天鵝湖」；之後同費拿喺周日晚出場打咗4局後又再落雨，點知咁都令迪祖靈機一觸，攞住條白色毛巾，齊齊同工作人員，喺球場上掃走雨水，拉起毛巾時又做出「鬥牛武士」動作，搞到對手費拿都忍唔住笑咗出嚟。
丹麥甜心捧盃停不了
將轉戰上海大師賽嘅迪祖，就話自己年輕力壯，好有信心可以繼08年澳網後再贏大滿貫冠軍，佢接受《新浪網》訪問時仲以中文咁講「我愛中國」、「你好嗎？」等等，且看「扮嘢祖」能否挾中網賽衞冕之勢，成功贏拿度、費達拿等強手。
至於女單方面，新任「1姐」丹麥嘅禾絲妮雅琪（右圖），喺決賽以2:1擊敗俄羅斯嘅施禾娜莉娃封后。