政府上星期公佈自願醫保最新方案，醫學界對方案議論紛紛，醫學會會長蔡堅噚日開記者會回應方案時形容，食物及衞生局推銷醫保計劃時「一味靠嚇」，佢仲引用《星戰》角色尤達大師嘅對白，話「恐懼會令人憂慮」，批評政府靠嚇推銷醫保，會令市民憂慮，以為唔即刻參加計劃，就會因為冇咗保費七折優惠而蝕底，畀政府咗落叠。
蔡堅叫市民睇定啲先決定，事關一旦政府500億元注資乾塘，保費可能狂升，隨時賺頭蝕尾。前年參加立法會港島區直選嘅史泰祖醫生，噚日都有現身記者會，會上提出「個人意見」，建議由政府撥地獨立機構做醫院，提供套餐式私營醫療服務，配合自願醫保計劃。蔡堅熟不拘禮，笑稱唔介意史泰祖預告來屆參選立法會政綱。