劉德華嘅太太朱麗倩近日傳出懷孕，但華仔就未有因傳聞而減少工作，最近仲密密為佢稍後推出嘅全新國粵語專輯《Unforgettable忘不了的》宣傳，連碟中歌曲嘅MV都花盡心思，佢之前拍《人辦》MV時已出動友情牌，力邀鄭秀文同鄭伊健等客串。至於喺另一首歌曲《大眼睛》中，華仔就化身成比賽主考官，喺MV中喺過百試鏡者中選出心水人選，當中有跆拳道高手、凶神惡煞嘅男人，又有肚皮舞孃及5歲細路女，各人喺華仔面前獻技，搞到佢捧腹大笑。
廣邀好友拍特輯
由於華仔入行已30年，所以特別拍攝咗一個「unforgettablemoments」電視特輯，特輯內除咗收錄佢歷年嘅珍貴片段外，仲輯錄埋華仔從未曝光嘅幕後畫面，又請咗杜琪峯、許鞍華、馮小剛、張藝謀、杜自持及華仔第一個經理人張國忠等做嘉賓，華仔嘅一班台前幕後好友會喺螢光幕前細訴佢哋眼中嘅華仔，當中有好多仲要係觀眾鮮為人知嘅事件，特輯今日起喺無綫播出，至於台灣同內地都會擇日播放。