劉曉波獲頒諾貝爾和平獎，據報佢嘅著作同相關書籍即時喺香港熱賣，有書店仲話存貨已經被顧客預訂晒。想睇劉曉波嘅書，其實仲有方法。雖然中共話劉曉波係罪犯，頒和平獎畀佢係褻瀆個獎，搞到香港特區由特首以至屬下大部份高官都唔敢同唔識回應，但康文署轄下公共圖書館，仍有部份劉曉波嘅書。
《零八憲章》有得借
八方噚日上網查過，例如92年出版嘅《末日倖存者的獨白：關於我和六.四》，中央圖書館嘅參考圖書館仲有得借閱，但放喺九龍公共圖書館嗰本已經借出咗。早期一啲嘅《選擇的批判：與思想領袖李澤厚對話》就七間圖書館都有收藏，屯門、上水都有。較近期嘅《大國沉淪：寫給中國的備忘錄》仲多，原本全港17間圖書館都有收藏，但唔知係咪近日多人借咗，家得番青衣公共圖書館仲未借出咋，要借就要快手喇。
至於劉曉波有份起草嘅《零八憲章》，14間公共圖書館有，其中大會堂等多間圖書館仲有得借。