強拍條例九降八後，好多舊樓都被田生地產貼滿紅色banner，十足被人淋紅油咁款。呢啲banner多數寫上恭賀本廈已被成功併購之類嘅字句，有啲大廈仲由外牆到樓梯都貼到紅噹噹，甚至出現「倒十字架」形banner，搞到街坊以為田生做咗救世主㖭。
有網民就四出搜羅拍攝田生banner，一系列照片放上網之後，引起唔少網民聲討、恥笑。獲藝術發展局資助嘅油麻地活化廳一班藝術家，最近就DIY整咗塊紅banner，掛喺舊樓外牆，實行扮田生玩田生。
banner上嘅田生商標，變咗活化廳logo，寫上「恭賀本廈已收撥款的活化廳」。香港地小市民想出番啖氣，有時真係要靠創意。