俗語都有話「愛情得意，事業失意」，呢句話用嚟形容F1衞冕英國車手畢頓最為適合，雖則佢同日本靚靚模特兒道端謝茜嘉愛得火熱，之不過佢喺賽前一個錯誤決定，最終令佢喺周日日本鈴鹿站僅以第4名完成，只能眼見紅牛嘅維特爾勝出開香檳，今屆衞冕幾近夢碎。
30歲嘅畢頓同日籍女友道端早前重燃愛火，兩人常以十指緊扣甜蜜示愛，簡直係羨煞旁人。今站亦喺道端家鄉日本進行賽事，故畢頓賽前稱好有信心喺「第二家鄉」揚威。
用硬胎博一鋪得第4
之不過或者係天意弄人，上周六鈴鹿落下滂沱大雨，排位賽被迫要安排喺周日早上進行，正式比賽繼續在下午舉行，令畢頓無法喺短短幾個小時之內，完全解決佢對軟胎適應不足嘅問題，以致佢以賭博式咁，喺賽前突轉用硬胎，因他認為硬胎喺53圈嘅長途賽中較為耐用，以節省入維修站換胎嘅時間。畢頓喺今季澳洲墨爾本站、中國上海站勝出，亦都歸功於佢願意博一鋪改變用胎策略，令佢好有信心，可以第3次因用胎策略勝出。
落後榜首韋伯31分
畢頓在開賽後中段確實憑策略奏效登上領先位置，之不過其他使用軟胎嘅車手嘅時間逐漸逼近，使畢頓無奈地亦喺第38圈改用軟胎，結果成績亦跌落至第5名；之後領先嘅紅牛車手維特爾、韋伯越跑越快，畢頓最終都欲追無從，僅以第4名完成；現時積分為189分，落後榜首嘅韋伯多達31分，喺今季僅餘3站下，要後上反勝真係難上加難，畢頓好失望咁講：「衞冕真係好困難，除非喺月尾南韓站有越卓表現。」想愛情事業都咁得意，又真係好難嘅！
失意嘅唔止畢頓一個，同樣同女友妮歌打得火熱嘅「黑帝」咸姆頓，今站以第5名衝線後，總積分落後韋伯28分，總冠軍夢都接近破碎，而連續兩年贏鈴鹿站嘅維特爾，總積分與西班牙嘅艾朗素同為206分。
F1車手龍虎榜
排名1：韋伯（紅牛）積分：220分
排名2：艾朗素（法拉利）積分：206分
排名3：維特爾（紅牛）積分：206分
排名4：咸姆頓（麥拿侖）積分：192分
排名5：畢頓（麥拿侖）積分：189分
F1日本站戰果
排名1：維特爾（紅牛）時間：1小時30分27秒323
排名2：韋伯（紅牛）時間：慢0.905秒
排名3：艾朗素（法拉利）時間：慢2秒721
排名4：畢頓（麥拿侖）時間：慢13秒522
排名5：咸姆頓（麥拿侖）時間：慢39秒595
註：只列部份
資料來源：formula1.com