辦亞運，還要加辦傷殘亞運，香港在傷殘運動員嘅建築設施方面非常缺乏，曾德成局長請注意吓。香港傷殘運動員在國際上嘅表現，非常出色，但每次出外作賽，閒閒地要幾十萬，並非容易籌集，故此「香港殘疾人奧委會暨傷殘人士體育協會」諸公，由主席馮馬潔嫻與各位職員常年籌款搵義工，實在功不可沒。今日下午二時至四時在將軍澳中心展覽A區繼續有殘疾運動員活動，各位如有親友/相識係殘疾青少年，不妨陪同佢地到場睇吓，會有精神鼓勵作用o架，余翠怡坐輪椅贏劍擊金牌，其他殘疾人士為何不可？
昨日講印度，並非有意批評，左丁山讀書時有印度教授，打銀行工有印度同事及上司，位位都係聰明絕頂之人，左丁山對佢地心服口服。有兩次聽過AmartyaSen（1998諾貝爾經濟學獎得主）演講及答問，深感此人學問之博之厚，令人吃驚，AmartyaSen做過劍橋大學TrinityCollege院長，現任哈佛大學哲學與經濟學講座教授，現任妻子（第三任）EmmaRothschild係研究亞當史密嘅經濟史專家。如此叻人，縱橫大西洋兩岸學術圈，與數百年歷史大家族羅富齊後人結婚，華裔學者諗唔到有乜人可與佢比較。平時我地見得太多印裔做看更，誤以為印度人唔多掂，錯之又錯。
陶傑對印度有更多認識，或者對此人才兩極化，有更好嘅深層次解釋。左丁山讀過一本小書，叫做RulesforRadicals，作者SaulD.Alinsky，奧巴馬在芝加哥做社區組織（CommunityOrganizer）時就熟讀此書。此書出版於一九七一年，但內容至今不算老餅。
Alinsky講及手段（means）與目標（ends）嘅倫理（ethics）第十條守則，引印度聖雄甘地之不抵抗運動為例子，甘地並非唔想用槍桿子搞革命，但佢手上冇槍，而即使佢有槍，佢亦冇法子推動印度人民起義，用槍趕走英國人，因為甘地知道，英國人已在精神上，強迫性地禁止印度人民持有武器，印度人不會有組織地拿起槍桿子來阻止外來侵略。既然印度人不願搞武力對抗，於是甘地索性宣揚非暴力、不合作運動爭取獨立，結果成功咗。換言之，叫印度人主動去砌就唔得，叫印度人靜坐不動如山，乜都唔做，就非常容易。現在印度已係獨立國家，情況與英治時代大大不同，但從英聯邦運動會之組織嚟睇，甘地時代嘅印度性格，仍有殘餘。