想睇辣車索模唔使等格蘭披治，早兩日在澳門舉行的「車天車地博覽會」一樣鬥得火熱，各款名車火併靚女車模鬥搶收視，加上香港車手到場煽風點火，現場表演響胎甩尾，全場起哄，另一邊仲有28位車模內訌爭做一姐，難為一眾車迷四圍走分身不暇，跑慢一步都走寶！
文：周達之
攝影：楊錦文
想感受刺激的朋友可以Click入去睇片內的「30秒飄移全程睇」，不過咪嫌我長氣，飄移甩尾極之危險，即使係James都要在做足安全工夫的場地先敢玩，讀者睇完之後用來打機玩《GT5》好了，千萬不要用真車來試！
好似坐緊過山車
James同Ray都是經驗豐富的車手，我之前在珠海等賽車場都訪問過James的Type-RClub車隊，可惜無機會搵佢醒我幾招，所以今次唔執輸，要求親身指導之餘，亦坐上助手席體驗一下甩尾的快感。直到James開車前一刻，我都無後悔上車，到起步直飆出去時卻突然有種「蒙主寵召」的感覺，只見James不斷轉軚拉Handbrake，而我眼前景物就變得一片模糊，引擎聲大得要震穿耳膜，甩尾時，即使坐在賽車桶椅都好似要被拋出車咁，我下意識一手拚命抓實扶手，一手抓實身上的長褲，因為好怕飆到甩褲呀！實際感覺同坐過山車真係無分別。
室內玩甩尾
上年「車天車地」叫好叫座，今年澳門威尼斯人繼續添食兼大搞，在金光會展晒冷，展出如Toyota、Benz、Audi、Jaguar、Volkswagen、BMW、Subaru及Lexus等一眾歐日名車。車迷亦可以參觀汽車護理用品及音響等，為自己的愛車裝身。除了名車靚模外，當日最搶鏡的當然是香港車手James及Ray的甩尾表演。
咪以為甩尾一定要在賽車場上高速掟彎，今次的甩尾表演正正就在這室內展館的一個小小場區進行。只見James同Ray好似玩魔術咁，在無乜衝力的協助下，全程用一、二波玩齊原地打圈、交叉8字、雙甩尾劈彎等花式，且表演不限於一架車，部份表演有兩架車同時在細細的場區內左穿右插，兩位車手神態自若，不過觀眾就睇到非常肉緊，表演完畢就拍爛手掌。
美女與香車
展覽會的主角當然是展出的60多架新車，由豪華房車、跑車，到電力巴士都有，不過以現場所見，參觀者對貴價豪華車大都限於遠觀，反而豐田展出的多款型號就吸引到唔少人試坐同詢問，尤其是Noah七人車同Corolla就更加是一眾實惠用家鎖定的目標，畢竟呢個世界「平、靚、正」永遠都是最受消費者歡迎。
場內還有各個售賣汽車精品、護理產品及賽車Games的攤位，同樣吸引不少人圍觀，不過講到最高收視，當然是28位車模行Catwalk，一出場就吸納半數觀眾，閃燈閃個不停，香車美人永遠都是男人無法抗拒的東西。
