社民連黃毓民噚日現身立法會，左眼卻蓋上紗布，原來佢日前同太太一齊驗眼，太太雙眼健康，佢就大鑊，左眼角膜穿窿要做激光手術，右眼則有黃斑點病變，排期月底開刀，第三重打擊係雙眼都有白內障，真係手尾長。
正所謂信你一成，雙目失明，黃毓民錯信邊個人，搞到眼疾嚴重呢？佢冇賴人，話都係長時間睇書、睇文件同電腦屏幕之過，雙眼都有成900度近視，一早睇壞對眼。
下星期三煲呔讀施政報告，毓民話大家唔使買定花生等睇獨眼龍大戰煲呔好戲，事關佢一定唔會再掟蕉或玩嘢，因為唔可以被逐出場，要留守議事廳投票反對擴大將軍澳堆填區，煲呔今年可以安心赴會。