最唔想發生嘅事，終於發生咗。中共政府最唔想諾貝爾獎委員會頒發和平獎畀劉曉波，偏偏今年和平獎由身在獄中嘅劉曉波獲得，無疑係對崛起大國十分唔畀面；雖然中共猛烈批評，聲言頒獎畀劉曉波會損害中國同挪威關係，不過好多人對呢個消息仍然欣喜若狂。
挪威記者越洋攞料
諾貝爾獎得主名單係最高機密，幾乎從未外洩，未到正式公佈一刻，外界無從知道，流傳嘅消息多數係山埃貼士。絕大部份香港人都係噚日傍晚知道消息，八方卻知道有人可能早24小時就收到風，隨時比全香港人早一日知道和平獎得主就在中國。
話說前日下午5點鐘左右，香港記者協會突然收到長途電話，電話筒另一邊傳來嚟自挪威的聲音，原來有個挪威記者，越洋致電香港記協，想問吓有關劉曉波嘅資料。據講該名挪威記者想問香港行家，可否提供同劉曉波有接觸或相關人士嘅聯絡方法。
挪威傳媒急急搵料，唔使問都知有啲嘢，不過該記者強調自己絕對冇內幕消息，只係想搵定啲背景資料以備不時之需啫。話雖如此，記協方面都不敢怠慢，加快草擬聲明，事隔一日，噚日下晝5點鐘就傳來劉曉波獲和平獎消息，記協隨即發出「預製」聲明恭賀劉曉波，又讚賞諾貝爾獎委員會有勇氣，唔驚中國外交部施壓。
港台重播訪劉片段
劉曉波最終是否獲獎，事前冇人知，即使收到挪威風聲，都要做兩手準備，據講記協同時草擬另一份唔係劉曉波獲和平獎嘅聲明，內容大致係恭喜得主，並促請各界繼續為劉曉波發聲，關注中國良心政治犯問題。
中共08年12月將劉曉波收監，香港電台節目《頭條新聞》08年曾訪問劉曉波，當時劉曉波狠批中共已經變質，由人民革命黨淪為純粹利益集團，一切只向錢看，傾全力鎮壓人民，唔畀下一代知道六四、文革、大躍進等歷史，港台網站噚晚即時將訪問片段放在頭版，方便大家重溫劉曉波風采，港台顧問委員會班「太上皇」，恐怕睇唔順眼了。
mailto:[email protected]