脫星並不易為，並非如鏡頭前所看剝晒衫咁簡單，《3D肉蒲團之極樂寶鑑》女主角雷凱欣，日前接受本報記者專訪時道盡箇中辛酸，為了出鏡好看而瘋狂減肥節食，壓力更令她患上嚴重抑鬱症，情緒失控如撞邪，幸好心結解開後，她越拍越投入，更希望藉此片脫出個未來。 撰文：比華利
o靚模出身的雷凱欣，雖有o靚模必備一對Fcup導彈胸，可是隨着年齡漸長，長江後浪推前浪，她若不另謀突破便難逃出局厄運，製作人蕭定一去年極力游說她露點演出全球首部3D情慾片《3D肉蒲團之極樂寶鑑》，雷凱欣思量過「錢途」和前途後，最終也放寬底線，實行露三點博出位。
「喺片場失控係咁喊」
雷凱欣胸前深長7吋的事業線，似早已預告可以在三級片上有一番作為，她自00年參加有線YMC台VJ選舉榮膺亞軍，早奠定她停不了的性感演出。不出所料，王晶最先慧眼識英雌，她說：「晶哥早年都搵過話要捧我做邱淑貞同舒淇接班人，傾咗三年我都未應承佢，呢次肯答應阿一（蕭定一），主要係我好鍾意個劇本，我嘅角色好有發揮，阿一又答應會拍得我好靚，佢哋不停修改劇本，我覺得自己家都夠成熟去接演呢個角色，咪決定畀自己挑戰吓。」
36F的雷凱欣敲響暴乳警告，誓要炸爆大銀幕，不過真正開拍時，衝破心理關口一刻竟又遇上重重阻滯，回想《3D肉蒲團》開工初期，她只是顧着減肥出鏡，忽略了要同步進行心理準備，以致早段開拍時情緒起伏很大，更突然患上一發不可收拾的抑鬱症，她說：「開工初期，我壓力好大，有時會嫌自己身形未ready，自己會不停亂諗嘢，分別有天使同魔鬼係咁喺個腦裏邊不停搶答，我試過喺片場失控係咁喊，好似7月撞邪咁。」
一切失常舉止都叫雷凱欣惶恐不安，最終只得面對現實接受治療，她後悔說：「我搏命減肥減過龍，搞到厭食症，不知不覺就衍生埋抑鬱症。」趕戲日接夜，夜接日，休息不足，壓力接踵而來，雷凱欣的病情更不受控，她說：「我試過休息時一個人匿埋廁所唔停咁喊，其實由細到大我都好眼淺，平均每日都喊一兩次，劇組都嚇到儍咗，佢哋好擔心我。」為免影響拍攝進度，劇組勒令雷凱欣放假一星期平靜思緒。
「日日抗抑鬱藥傍身」
這段時間，不論雷凱欣的親友，甚至蕭定一和劇組都憂心忡忡，大家輪流開解她，雷凱欣難忘大家的關心：「雖然我睇咗心理醫生，日日仲帶定抗抑鬱藥傍身，但我唔想依賴佢，唔想畀啲藥控制自己，慶幸最終我一粒都冇食過，朋友嘅開解先係靈丹妙藥，為我打開心結。」
心藥醫好心病，雷凱欣便帶着歡顏重投拍攝大隊，她看到同片兩名日本AV女優周防雪子和原紗央莉的專業態度，更視她們為學習目標，最後雷凱欣也慢慢適應了拍攝過程，一絲不掛與拍檔葉山豪床上肉搏更駕輕就熟，她說：「最初拍俾人摸胸戲其實都幾尷尬，但拍吓拍吓都慣咗，話就話裸露戲份會清場，但試問清得幾多，根本冇可能清得晒，我後嚟都豁出去。」雷凱欣索性阿Q精神，她信心爆棚，自豪地說：「身形好怕乜畀人睇，加上人長大，思想成熟咗，我一係唔做，一做就要做到最好，我要為屋企人爭番啖氣。」雷凱欣最怕網民的惡意批評，她曾表示這段時間會避免上網看留言，也懶理被冠上脫星或淫蕩之名，她說：「我拍戲啫，又唔係打真軍。」
行性感遭長輩訓話
雷凱欣最擔心是流言中傷其家人，因為任何時候，家人永遠是她的避風港，一直默默支持她。提到錫到她燶的爸爸和媽媽，雷凱欣眼淚即如缺堤般滾下，她邊拭淚邊紅着眼說：「我爸爸係大家族，親戚思想好傳統，有個長輩自幼都向我訓誨，尤其我呢次咁任性嘅決定，我一定堅持做到最好，唔想令爸爸媽咪冇面。」
雷凱欣續說：「最初我入行行性感路線，過時過節家庭聚會，已經有長輩嚴加反對，好似軍官向我訓話，爭在未拎條藤條出嚟打你。」為專心拍好《3D肉蒲團》，雷凱欣特別搬離家人獨居，該片接近埋尾，重頭戲也順利完成，她此刻最期待是電影煞科後，可以返溫暖的家，吃媽咪親手炮製的避風塘大餐。
雷凱欣：有愛才可有性
本月底便27歲生日的雷凱欣，在人生分岔路，退出娛圈嫁人還是留低再博一鋪，她決斷地揀了後者，還去盡希望一脫成名，雖然珠玉在前，三級女星葉玉卿最終嫁得好，洗盡鉛華變幸福少奶奶，但始終未必個個可成卿卿倒模，脫星難免是一條不歸路。
「多咗追求者」
雷凱欣說：「我諗清楚露兩點都知自己行咗入不歸路，最初都擔心會唔會將來嫁唔出，但細心諗吓，時代不停進步，人嘅思想點會比以前『萌塞』o架！」
尤其接拍《3D肉蒲團之極樂寶鑑》後，雷凱欣曝光率大增，她的擔憂頓時一掃而空，她說：「我呢排人氣提升，反而身邊多咗追求者，但呢段時間我要趕戲，一定唔可以投入戀情，因為我怕拍咗拖會影響我某啲判斷力，寧願單身冇後顧之憂，事業機會唔係時時有，拍拖反而幾時都得。」
雷凱欣直認守齋接拍《肉蒲團》，她豪情快語說：「咁部戲都好快拍完。」雷凱欣變身脫星後，性愛觀會否較從前開放，會渴望有性先還是有愛先？她爽快回答：「我承認性係生活嘅一部份，但我對性愛就一啲都唔開放，我要有愛先可以有性，我雖然好細個就入行，仲行性感路線，外間一定好多人以為我好open，其實我嘅思想超級傳統又保守。」
「抗拒一夜情」
外表女人味濃，擺親甫士影相都引死男人的雷凱欣，原來鏡頭後性格男仔頭，她說：「我抗拒一夜情，我一啲都唔隨便，唔合我擇偶條件嘅男仔埋身我會推。」雷凱欣情有獨鍾愛心猛男，說真的，女生事業幾強都想有個男人膊頭做依靠。
雷爸爸：對個女有信心
身體髮膚受諸父母，當雷凱欣決定接拍《3D肉蒲團之極樂寶鑑》，身體赤裸裸暴露大銀幕前，她事前也問准父母才答應接拍。雷爸爸日前接受電話訪問時，非常支持女兒作突破。
雷爸爸認為女大女世界，做父母的應尊重子女的決定，他說：「我一向畀子女好大自由度，小欣細細個就好自律，我對呢個女好有信心，佢從來冇闖過禍要我哋擔心，又冇反叛，我好放心。」
「希望佢開心健康」
雷凱欣在娛樂圈行性感，雷爸爸力排長輩反對獨撐女兒，他認為女兒只是為藝術犧牲，外間不應戴有色眼鏡，雷爸爸生女知女心肝，他最擔心是女兒受到壓力，他說：「我最擔心佢承受好大壓力，始終父母畀個身體佢，梗係希望佢可以開心健康，工作還工作嘛！」
雷爸爸雖不恨嫁女，但每次當雷凱欣帶男友見家長，雷爸爸必會金睛火眼選婿，他說：「小欣每次拍拖，佢都會帶返嚟畀我哋過目，未必個個我同佢媽咪接受，不過我哋就算幾唔鍾意，都唔會直接講出嚟。」
雷爸爸覺得棒打鴛鴦只會招惹子女反感，他反而會另用高招讓女兒知難而退，他說：「我同佢媽咪會喺適當機會同小欣分析，我哋岔開話題，同小欣講佢仲後生，男朋友可以慢慢揀到啱。」