灣仔Queen'sCube，為近期首個認購不足的新盤，雖然情況不常見，但絕對非意料之外，該個由巿建局及南豐合作發展的新盤，單位夠晒袖珍，但開價出奇的高，首日開賣幾乎食蛋（僅沽出兩伙）。
單位細失內地豪客
位於灣仔的Queen'sCube開則開到細過時鐘酒店房，原來這是巿建局的意見，事關該局怕被外界指駡賣貴價豪宅盤，開細則，每伙銀碼相對細，然而呎價貴過同區同類單位一成多，加上內地大款不喜歡這麼細的單位，所以該盤出現認購不足，可說是與開錯則有莫大關係。
在賣樓策略上，Queen'sCube亦可謂失策，事關開盤時，與長實（001）開賣的馬鞍山天宇海千多伙檔期幾乎完全重疊，但南豐無理由唔知長實賣樓例牌一Q清袋，因此最理想的開盤方法是避風頭，所以應趕在天宇海前開售，如果真係做唔到，最多將開售期押後，但南豐則不理客源已被長實吸盡的現實，緊隨開售，這種賣樓安排又怎不會不出事。
兩盤地區雖然不同，但由於價位相近，但兩盤都係針對銀碼600萬至1000萬元樓的買家，但天宇海以巿價開盤，Queen'sCube開價則去得太盡，一前一後比較，結果是意料中事。一般而言，其他發展商見長實開盤，通常都會避一避，以免貨比貨，但南豐這次前期工作做得實在太多，單是前期活動都搞了好幾次，不過搞來搞去，效果差強人意。
唯一出路先封盤後減價
Queen'sCube要去貨，已變得十分艱難。事實上，該盤400方呎單位都要賣600萬元，這個價位已可買得太古城600幾方呎單位，所以想不通該盤哪方面會值那麼貴，如果喜歡蒲，不如選中半山二手盤，呎價一萬多元有交易。照這樣分析，南豐最好先將該盤收起，然後三幾個月後大幅減價後重推，這是該盤唯一出路。
何熊輝