戰爭迷一向勁Buy二戰時期嘅射擊Game，貪其真實又有歷史支持，好過憑空想像去未來打外星人。《MedalofHonor》一直玩開二戰懷舊Feel，但喺即將推出嘅最新作之中，卻來個大革新，將舞台搬到現代戰爭，背景就係2001年嘅阿富汗戰線。呢場反恐戰到家都仲打緊，到底喺呢隻Game入面捉唔捉到拉登呢？
文:阿洛
急召戰機護身
《MedalofHonor》系列已經推出了11年，合共有16款作品，皆是以二戰世界各區戰線為背景。可能驚當時嘅細蚊仔都打到變成年機迷，係時間要轉轉口味，所以揀選了2001年開始嘅阿富汗反恐戰爭為主題，令鍾意睇德甲最愛日本潮流的70、80、90後都可以更投入。今次玩家可扮演合共四名不同角色，而所屬部門則包括海豹部隊、三角洲部隊及美國游擊兵，除咗可以喺黑暗下潛入打爆頭，亦可以在阿柏奇直升機掩護下衝入山區或操控機炮橫掃敵軍，仲有，可以Call架戰機進行轟炸，玩法更加多變，唔係一味主觀射擊當兵射到尾。
轉揸直升機掃射
大家心目中嘅阿富汗都係沙塵滾滾，但實際除了沙漠地區外，今次還有河邊山谷、城市窄巷及積雪嘅雪山等等。而玩家喺不同關卡面對嘅敵人都會有所不同，例如可能會被人十面埋伏，面對海一樣嘅敵軍，亦可能會遇到自殺式炸彈車，經過重重困難，先等到阿柏奇直升機幫拖。呢個時候，鏡頭一轉玩家就會成為機上機炮操控手狂掃先前圍攻你嘅敵人，流暢嘅過場動畫令人投入感大增。
真槍錄音實戰一樣
名牌唔易做，《MedalofHonor》之所以受歡迎，因為製作認真跟足時代背景及武器款式。製作單位找來擔任過軍人的顧問，從而制訂戰術走位、武器款式同運用等配套，另外武器嘅槍聲亦係用真槍錄製，令玩家就如置身真實戰場一樣。而且唔只得個殼，今次廠方更搵嚟老兵及現役軍人分享戰場上嘅心情，實行打機都由心出發。至於多人連線模式，依然多花款，當中更有12對12嘅大型戰場。話你聽，仗，並唔係一個人打嘅。
《MedalofHonor2010》
主機：PS3/Xbox360/PC
類型：射擊
廠商：ElectronicArts
人數：1-24人
發售日期：10月12日