前日啱啱30歲生日嘅陳冠希（Edison），最近趁住淫照件事被逐漸淡忘復出樂壇，趁生日將新歌《MRSANDMAN》派上台，MV喺YouTube嘅點擊率已過萬。不過佢嘅舊愛鍾欣桐（阿嬌）都唔輸蝕，搶先Edison一日喺微博上載新歌《你不會懂》MV，憑歌盡訴失戀情。
一齊憑歌寄意
陳冠希兩年前引爆嘅淫照風暴，受牽連嘅女星無不人氣下滑，但經過時間洗禮，Edison同舊愛阿嬌都先後復出。阿嬌大前日搶先喺微博上載新歌《你不會懂》MV，事隔一日，Edison則趁自己生日推出新歌《MRSANDMAN》冲喜，過氣情人打對台。
阿嬌日前先喺微博拆穿一個A貨陳冠希，睇嚟佢對舊愛仍念念不忘。大前日佢喺微博上載嘅新歌《你不會懂》MV試睇版，首歌係失戀情歌，佢演繹時一臉傷感，其中歌詞仲提到：「傷勢仍然很重，請你無謂觸碰，這傷痛，懂不懂，分手應該假裝不懂。」
這邊廂嘅Edison就用普通話rap住唱《MRSANDMAN》講心聲：「我叫陳冠希，和你一樣，我有痛苦和壓力，也想過要放棄……我的生活像是一場馬戲團的show，跳來跳去下一關。」
被批咬字唔清
Edison又喺歌詞中講：「她是個younglady會被老板吃吃豆腐牽牽手，摸摸屁股品頭論足她穿的衣服……她討厭她的boss有苦難言。」不過中文唔好嘅佢咬字唔清，被網友狠批頂唔順。
淫照事件後，Edison曾話過無限期退出香港娛樂圈，所以這次宣傳新歌，佢會喺香港以外嘅地區造勢，換句話講要放棄本港巿場，佢話：「不是放棄，我只是不想重複做過的事，我在香港很多東西都試過，還拍過全年最賣座的電影，也拍過廣告，連A1（港聞頭版）都上過，我想嘗試新東西。」
Edison想開拓內地巿場，佢今個月23號會同劉德華、黎明、楊千嬅及鄭秀文等到上海世博出席「東亞飛揚演唱會」。
