跑馬地毓秀街11號嘅良心業主伍集成家族後人，早排宣佈保育呢幢有76年歷史嘅歐陸式三層高住宅，四圍搵專家幫手。最新消息係，業主伍女士搵過日本建築大師伊東豐雄，對方推介徒弟中山英之為伍家提供意見。
伊東豐雄喺日本建築界享負盛名，同另一日本建築大師安藤忠雄並稱「雙雄」，中山英之係伊東豐雄入室弟子，自然有咁上下造詣。現年38歲嘅中山英之有啲似本地樂隊「農夫」嘅陸永，今次係首度嚟香港參與建築項目，今日起至下個月27號喺灣仔集成中心舉行個人作品展。
毓秀街11號地舖正招租，業主伍女士話如果新租客符合保育條件，平啲租都唔介意，據聞超市惠康好有興趣，但面積僅1,700平方呎，做便利店啱啲。