香港申辦亞運之說，因民建聯反對，立法會內無政黨支持，大概就此收檔。辦大型地區性、全球性運動會，引用家計會嘅老口號就得：「追得到，未必好」，例如印度涉嫌行賄，爭到二○一○年英聯邦運動會主辦權，希望藉此一揚國威，向英聯邦成員國表示，印度站起來了！點知道開幕前就畀西方傳媒唱衰，開幕後，各國泳手紛紛患上腸胃炎，大概係泳池水唔合衞生標準啩。
冇錯，印度人在英語服務業、軟件業等方面，領先中國，經濟增長好快，兼且人口眾多，超過十二億人，而且年輕，六成在二十五歲以下，活力十足，前途無可限量。但奇怪嘅係，印度人不擅長辦理大型組織性嘅活動，基建業冇法子追得上，今次辦英聯邦運動會，事前已經亂晒大龍，嚇走西方一級選手，外國記者所見係：選手村內地面滿佈垃圾、建築廢料、電線盤纏、糞便處處、床鋪污穢。總之以西方衞生標準，不合人住。據講印度主辦單位為咗趕工，承建商聘請大量工人，街頭流浪漢都請埋，佢地每晚收工之後，無家可歸，無處可睡，就在選手村內過夜不走，致有此「禍」！
講番亞運，今屆會在廣州舉行，此日中午吃飯後，在金鐘地鐵站通往太古廣場隧道，碰到靚女JennyFung，馮載祥太太是也。退休咗咯喎，仲叫Jenny做靚女？騎騎，見過佢真人就知，退咗休嘅女士仲可以似佢咁容光煥發，活力充沛嘅，並不多見，Jenny話佢從中環鏞記食飯之後行路返金鐘，當做運動喎。
Jenny係香港殘疾人奧委會暨傷殘人士體育協會（HKPC&SAPD）主席，第一屆亞洲殘運會在12月12至19日在廣州舉行，Jenny正為籌備香港隊參賽，緊張得很，會派出超過一百名殘疾運動員參加，今日（10月9日）與明日（10月10日）在將軍澳中心展覽A區辦活動，下午二時開始，明日有金牌選手余翠怡、陳蕊莊（輪椅劍擊）到場接受訪問，大家不妨到場支持。