民主黨副主席劉慧卿自從幾年前爆冷當選立法會財務委員會主席，之後每一次改選，幾乎都要出盡九牛二虎之力，先至可以撼低建制派候選人成功連任。噚日財委會又再選舉新一屆主席，今年初高鐵撥款時大讚卿姐主持會議公道嘅建制派，言行一致今次冇派人同卿姐競爭，獲建制派放生，卿姐首度自動當選，繼續同劉秀成拍住上做正、副主席。
內務委員會選舉亦冇驚喜，已經冧莊咗N年嘅自由黨主席劉健儀以及民主黨黨團召集人李華明，再次以冇敵手姿態連任。雖然財會同內會選舉冇競爭，不過稍後成立嘅競爭法條例草案委員會主席則爭崩頭，據聞經濟動力梁君彥同公民黨湯家驊都好有興趣，暫時以建制派支持嘅梁君彥看高一線。