民主黨16周年黨慶，場內主角係劉曉波，場外主角係大劉個仔劉鳴煒。維園阿哥馬草泥、鹵味男等十幾個兄弟，噚日帶同「民主病夫」橫額踩場，堅持直上13樓宴會場地向何俊仁下戰書，為免混亂，民主黨請咗十幾個保安到場。
籌款110萬破紀錄
不過馬草泥等人擾攘幾個鐘始終上唔到樓，事關噚日壇嘢在尖沙嘴TheONE舉行，呢個場係大劉嘅，佢乖仔劉鳴煒親自去睇場，眼見馬草泥賴死唔走，劉鳴煒都忍唔住以商場負責人身份請佢走。
大劉連「老實商人」都敢單挑，馬草泥踩佢個場又唔畀面太子，八方祝佢好運。馬草泥等人企硬要何俊仁親自接橫額才罷休，但何冇露面，眾人鳥獸散。民主黨元老司徒華對踩場者不以為然，指佢哋「完全冇理智，亂咁噏」。
梁振英噚晚坐足全場，以5萬元投得華叔「字花」（即係未寫嘅墨寶）一幅；唐英年捐咗支紅酒畀民主黨拍賣籌款，由政協劉夢熊以10萬元投得，佢話家陣民主黨都係愛國政黨，捐錢畀佢哋心甘命抵。昨晚共籌到110萬元，打破歷年紀錄。