"黑池睇咗成季先扑中"
沒有畸寶就冇睇過波？講出嚟都冇人信，尤其禮拜六日要返工，簡直係環迴立體聲，公司幾部電視分途播兩個收費台成晚嘅直播。返到屋企，哺喺電腦面前，凌晨想睇乜都有；大癮嘅，真係晚晚唔使瞓。上周末重心貼中黑池12倍冷W有啲好彩，跟開本欄也知，小弟由上季中，場場睇好英冠黑池，撐佢哋打入前6，踢到升班附加賽最後一場先放棄，改捧卡城跌眼鏡，大家可上網翻看「昔日蘋果」；今季佢哋升班也成日睇，主攻打法印象難忘，呢場大字標題中巨冷W有幸運成分，只可惜串埋另一大冷阿仙奴唔中。所以意德波，一直唔敢獻醜，因為今季冇認真睇過。
"紅軍頂多中游"
看到兵工廠對車仔又冇得抽，心情沒有太低落；至於換老闆後嘅紅軍，會唔會變天，就要拭目以待。不過，現時利記陣容存有重大缺失，年逾30嘅謝拉特一人難撐中場。祖高爾只係冷殺手，只見後防兩位英兵加歷查及格連莊臣輪流犯錯；喺家陣容對比前兩季變動太大，處換血期，今季守到中游已唔係太差咯。我信風水輪流轉，所以做人從來唔應該有風駛盡，貼士中到應唔會囂張，唔中咪虛心啲，下次畀心機咯。
"土軍6.7倍丹麥5.75倍"
波友會留意到，今期為遷就米飯班主（廣告），再遷就歐國盃，提早一天出街嘅〈開倉〉版略為縮水。呢類波，我老實認冇乜研究，故貫徹宗旨，博冷！重心，捧土耳其作客德國出冷，[+1]兼6.7倍冷W。由神奇教練軒迪克擔大旗後，土軍戰績冒升，到德國作客，捧場僑民特多，冇乜蝕底；碰巧對手傷兵滿營，博得過。副選，博丹麥作客繼續剋死剛換帥的葡萄牙，平實球隊巧遇由C朗及拿尼領軍、最浮誇之南歐兵，北歐兵丹麥5.75倍W連[+1]啱數。
語錄：遇到唔熟球賽又想躍躍欲試，更要從賠率取捨，可抵銷表面數據及實力較次的缺點。