縱使《戀戰特務王》（Knight&Day）挽回不少評價，其票房失利令荷李活動作巨星湯告魯斯（TomCruise）需盡快翻身，否則隨時拜拜。結果靚佬湯於新作《職業特工隊》第四集《Mission：Impossible4》博到盡，昨日他在布拉格無懼寒風赤裸上身，並親自做危險動作，單是誠意和態度已值得欣賞。
因06年拍攝《職業特工隊3》（Mission：Impossible3），靚佬湯和派拉蒙電影公司鬧不快，導致雙方不歡而散終止合作。失去靠山的他雖入主UA學人做老闆，創業作《華爾基利暗殺行動》（Valkyrie）卻慘敗收場，連同《戀戰特務王》票房失利，動搖其巨星地位，令靚佬湯不得不力求翻身。巧合地派拉蒙近年同樣欠賣座作品，勉為其難才肯破冰，雙方各有所需下，靚佬湯便在《職業特工隊4》搏命瞓身演出，務求大打身價波。
親自演跳樓戲
繼日前在捷克布拉格的連場文戲後，靚佬湯終變回《職業》系列為人所識的動作型男EthanHunt，昨日他在一棟大廈拍攝飛天遁地場面。即使天氣漸冷，靚佬湯竟不畏寒意裸露上半身，並呈現沒有多餘脂肪的魅力胴體，那些結實腹肌加上依舊俊朗樣子，令現年48歲的他吸引力絕不比廿來歲後生仔遜色。
靚佬湯向來堅持動作場面盡量親自上陣，故他打大赤肋站在三層高天台，經綁在腰間的威吔協助下模仿一躍而下驚人動作，並在半空做些平衡姿勢，再翻觔斗撻落地上貨車頂部，營造出跳樓飛躍到車頂的動態。當拍攝完畢，靚佬湯即穿回羽絨外套取暖，態度極專業，加上身手依然敏捷，可知他對拍這齣戲付出良多，求翻身之意顯而易見。
弗到爆難讓位
即使有傳派拉蒙欲找新人頂替靚佬湯，今集先讓《拆彈雄心》（TheHurtLocker）男星謝洛美維納（JeremyRenner）做靚佬湯助手做第二男主角，待下集便由謝洛美擔正，從目前靚佬湯的弗爆狀態來看，無人可取代他的地位。
目前劇組尚留捷克開工，之後轉戰杜拜及溫哥華，最後就拉大隊回洛杉磯為電視埋尾。靚佬湯連日既扮俄國軍官又做T恤潮男，有指今集的特務要素會是四集之中最豐富。