【本報訊】肩膀痛、手臂「不舉」，是操勞過度、關節炎，還是五十肩？有中年女士肩痛逾10年，不能抱孫、不能洗菜、胸圍也扣不到，直言「痛過生BB」，直至去年才發覺原來是肩膀旋轉肌腱撕裂。醫生提醒巿民，此病不能自癒，只有手術能根治，若不理會會令肌肉僵硬，裂口擴大。
記者：張嘉雯
現年61歲的何女士右肩痛超過10年，被診斷操勞過度、關節炎、網球肘，中醫、西醫、針灸、氣功、物理治療統統試過無效，6年前因為痛楚加劇，被迫提早退休，「洗菜洗唔到，連水草都拎唔到，家務全部做唔到，想抱吓個孫又唔得，扣胸圍都唔得，隻手伸唔到去後面，要喺前面扣完再轉去後面」。
婦痛10年形容慘過生仔
她形容肩膀名副其實「痛到想死」，「痛呢樣嘢好難同人分享，無人幫到你，急症室都入過，咁多次都話無辦法，夜晚最痛，寧願生幾個BB都唔寧願咁痛，有時真係會諗點解唔死咗去，死咗仲好過」。
去年她再向專科醫生求診，結果發現右肩岡上肌中度撕裂，長1厘米，去年10月接受手術，現已完全康復，「家差好遠，乜都做得到，抱孫都得」。
骨科專科醫生周啟斌指，何女士右肩撕裂的部位屬旋轉肌腱，分為四組，作用是控制及協調肩關節，其中岡上肌因為血流量少，因此最易受傷，撕裂後不能自行修補，若不治理，患處會變得僵硬惡化，甚至無法抬起手臂。
他解釋，患者通常在舉高手、推門、拿重物及伸後向後時感到肩骨邊至上臂外側疼痛無力，晚上睡覺時痛感更明顯。此症容易與冰封肩、五十肩混淆，只能以磁力共振斷症，X光亦診斷不到。
何女士屬於退化性撕裂，通常出現在50歲或以上人士；另一種撕裂由創傷引起，「好多時係跌親，叉隻手落地撐住整親」。此外，劇烈運動、拿重物亦可能致傷，患者可以聽到「啪」一聲撕裂，俄羅斯籍網球手舒拉寶娃兩年前也出現旋轉肌腱撕裂，當時她只有21歲。
裝修工網球員風險較高
現時只有手術可以徹底修補撕裂，醫生會先清除撕裂部位的發炎組織，然後把健康的肌腱與骨骼縫合，「如果太耐，啲肌肉萎縮咗，啲肌腱同啲疤痕組織黐埋一齊，就要先鬆返啲肌腱，先可以再拉出嚟」。手術後約四至六個月後可完全康復及進行運動。
經常要舉高手的人士，如裝修工人、網球員、舉重運動員及健身人士，因為經常磨擦筋腱，旋轉肌腱撕裂的風險也較高，平日應多做熱身及伸展運動，減少舉重物的頻率。