港產漫畫衝出香港！今次輪到名聲威震社運界嘅CusonLo，呢位公投運動期間全力創作感動港人嘅漫畫鬼才，作品《邪惡雪姑七友》獲得南歐國家克羅地亞文化創作人嘅賞識，轉載到當地雜誌《KUPUSOVLIST》，可喜可賀。
Cuson話，今年7月收到《KUPUSOVLIST》總編輯嘅電郵，情商借用《邪惡雪姑七友》作為插圖，配合一篇討論漫畫教育兒童嘅文章。Cuson喜獲知音，甘願分文不收，佢話早喺上年已經有意大利唱片公司抄襲咗呢個作品，估唔到外國咁多人欣賞身穿黑衣、目光猙獰嘅雪姑。
中文姓名盧熾剛，Cuson現年38歲，為人熟識係上年年底五區公投運動醞釀時，正職廣告公司插畫師嘅佢，眼見很多人不了解公投，義務將箇中理念化成《五區公投》漫畫，透過網誌同facebook發表，隨即紅爆網絡，係新一代有火嘅創作人。