老牌上市工業股傳承至第二代，女兒不負老爹寄望，與女婿共同努力落手落腳打拼，難得過去幾年因為埋頭苦幹專注睇廠而未有機會與私人銀行家為伍，結果在金融海嘯中未損分毫。
上市公司經過08年因原料價格影響業績倒退後亦好快恢復增長，45年屹立不倒真係唔容易，作為老闆深明個人投資不應與上市公司混為一體，幾多上市公司美其名表面話係對冲，說穿了其實係對賭，唔少老牌廠家期間俾衍生投資產品一鋪清袋。以為ELN安全，接咗貨股價仍未見家鄉者大有人在，廠家話當年科網熱潮兩公婆買咗隻8號仔ELN，點知接晒貨後狂跌，最後白白唔見咗9成本金。
但係親眼見行家在金融海嘯中沒頂咁慘情，佢好慶幸咁話諗番轉頭今日真係要感激隻8號仔，唔係嗰一鑊輸得佢咁慘後，之後嘅投資取向都唔會變得咁謹慎小心，唔信ELN、不為高息所動、專注本業，把外父嘅紙業貿易生意延伸至產業鏈上游毛利更高嘅紙品製造層面，成功把毛利由過往之9.5%提升至11.4%，雖然製造部份仍只佔總體營業額9.2%，但經營利潤率就有4.37%，較貿易業務之3.7%高，證明第二代轉向上游業務轉型成功。
信分析員不如信自己
睇住家隻香港交易所（388）升到飛天又痛恨自己無貨者，諗番起07年268元買咗港交所阿Q嘅苦主家通通真係變晒阿Q嘅都猶有餘悸。「阿Q精神自欺欺人」，咁點解當年港交所乜都唔做可以賣2百幾元都有人吼，家李小加寫完萬言書仲要覓得猛人打天下都唔見有更多人識及時轉軚上番車呢？等咗咁耐，終於等到股價由125元升到近165元，先至有大行有前無後出報告同你講佢睇200元，好明顯係分析員未見過之前升咗40蚊，都未敢相信後面仲可以再升多40蚊。既然咁遲通知，倒不如用番個人智慧行事。
胡孟青
獨立股評人