每個人要管理好自己嘅財富，最好就係將之視作一盤生意。有唔少財務策劃師都建議，就當自己嘅財富係一盤生意咁經營，做齊資產負債表同損益表（P&L），如果成日都入不敷支，就要睇吓報表，研究吓究竟邊度使大咗，下個月就要慳啲使。
敏妮有一個朋友，對於將自己嘅財務視作一盤生意咁打理，仲將呢盤生意發揮得最淋漓盡致。一般人最唔想就係孭到一身債務，通常財務策劃師，都會叫人先清償債務，減低借貸的利息的開支。不過，不少生意人都認為，有適當債務反而係好事，因為借人家嘅錢做生意，只要投資回報高於貸款利息，其實已經除笨有精。除此之外，就係要求有較長嘅數期，即係入咗貨，但到期都唔使咁急畀錢住。
將自己財富當生意
敏妮呢個朋友其實未到借孖展炒股嘅階段，只不過係鍾意拖吓數咁。敏妮都有問過佢，「你又唔係冇錢，點解要拖人數呢？」佢話要試人家嘅底線，咁究竟點樣試人家嘅底線？方法就係，每個月都會延遲幾日先交租，今個月遲咗兩日，下個月就遲夠3日先交，由於業主會有最後通牒，去到嚟真要換鎖趕人之前嘅底線，呢位朋友就會立即交租。敏妮唔明，「點解要試人底線，咁會影響自己嘅credit。」朋友話呢啲係為自己提供彈性。
除咗拖數之外，佢仲好鍾意拗數。舉例外遊時用電話漫遊，令電話費突然增加，佢通常會打電話去電訊公司，問點解費用咁貴，然後再問人哋攞折扣，「只要同熱線職員講，上次問都有畀到折扣，你不如問吓上級先。」通常都會有少少discount。
敏妮雖然對呢啲做法唔係咁認同，但正如朋友所講，做生意乜都要算盡，先至可以提高回報，何況又唔係賴賬，更加唔係走數唔畀，折扣真係冇的話，結果都係會照交錢，但只係需要打個電話問吓，就可以慳番啲，點解唔試。
溫敏妮
http://wanmanli.com/blogs/