民協馮檢基搞社企有年，喺油麻地有間按摩店，不過近日結業，一來捱唔起貴租，深層次原因係佢唔想撈偏，免得民協千年道行一朝喪。基哥話旗下按摩店係非一般骨場，規定只做膊頭以上，膝頭以下地方，不提供全身按摩服務。由於腳底同肩頸按摩收費有限，所以按摩店一直只能維皮，佢話其實員工多次提出不如做埋全身按摩，希望搵多啲錢，不過佢堅拒，唔係嫌錢腥，而係擔心有人心邪搞出事，一旦爆出情色誤會或糾紛，民協就千年道行一朝喪。骨場結業，基哥話最可惜係一班員工冇嘢做，當初搞按摩店想幫中年人謀生，家會介紹佢哋轉工。