政治上無永遠嘅朋友，亦無永遠嘅敵人。6.23政改後，香港政壇一夜間移形換影，所謂親疏有別嘅政治術語重新定義，一直被打壓嘅民主黨，搖身一變成為政府盟友，被視為執政聯盟一部份嘅民建聯，分分鐘要面對官員冷面孔。
維園阿哥踩民主黨場
為咗成功擴建將軍澳堆填區，唔好俾立法會將特首命令廢除，環境局局長邱騰華噚日親自出席民主黨立法會黨團會議，閉門向民主黨拉票，不論有冇效，已經擺出誠意十足姿態。高官去民主黨黨團會議並非首次，多數係解釋政策，上門拉票都算罕見。
邱騰華咁畀面民主黨，反而民建聯卻無此待遇，只係由副局長潘潔應酬民建聯，今日同陳克勤及一班區議員會面，聽佢哋對改善堆填區臭味意見。民建聯曾經抱怨同政府合作有辱無榮，今次嚐到親疏有別滋味，唔知又有甚麼感受？
獲特區禮待嘅民主黨今日舉行16周年黨慶酒會兼晚宴，多個地產商一早買枱祝賀，特首煲呔今日亦會首次出席民主黨酒會，亦係回歸後第一次有特首出席民主黨黨慶，煲呔對民主黨另眼相看，其他高官又點能夠唔釋出善意，錫住民主黨呢？至於中方官員會唔會現身，據講暫時未有任何動靜。
民主黨好似漸變建制派，昔日支持者睇唔過眼，馬草泥同一班「維園阿哥」及「選民力量」已召集十幾廿人今日去贈興，馬草泥話已訂製「民主病夫」橫額送畀民主黨，又會同鹵味男一齊化身陳真去踢館，向何俊仁下戰書，邀請佢單挑，唔係動手，只係動口，辯論香港民主大業如何走。馬草泥好唔客氣，指如果何俊仁不應戰，就同民建聯無分別，只係民主病夫。社民連今日亦會在泛民飯盒會上要求民主黨退出飯盒會，否則不作瓦存。
恐其他賓客受到影響
特首到賀有人踩場，八方聽聞民主黨方面十分緊張，唔係擔心煲呔安危，事關警方早就做咗嘢，相信馬草泥等人動不到煲呔分毫，反而怕維園阿哥人馬沓沓，搞到場面混亂影響其他賓客就唔好啦。
mailto:[email protected]