韓國天王Rain主演的韓劇《逃亡者PLANB》現於當地熱播，劇中飾演女特工的何超儀，早前在北京會合劇組開工，大讚型仔Rain沒架子，Rain更鬼馬地揸扇扮公子，反而超儀老公陳子聰前來探班時，卻被老婆取笑這個肥佬好老土。
何超儀早前在北京拍攝由Rain及李娜英等合演的韓劇《逃亡者PLANB》，她昨日將眾人合照及拍攝花絮放上blog任人觀賞，其中有Rain揸扇扮翩翩公子，超儀讚他「很玩得，又冇架子。」不過她在另一幀跟老公陳子聰等人的合照上，卻留言取笑道：「後排那個肥佬，好像叫陳子聰，來探班，老土。」超儀口是心非，其實對老公專程探班不知多心甜。
韓國傳媒讚清純
今次超儀在劇中扮演女特工，與Rain不乏對手戲。攝製隊早前在北京798藝術區拍外景，超儀穿上心口開窿的緊身裙現身，由於其對白包括廣東話、普通話、英語和韓語，她笑言自己多聲廣播，有時都講到亂晒龍，幸大夥兒合作愉快。作為劇中唯一中國女演員的她更一盡地主之誼，帶Rain及李娜英等嘆當地厲家菜，但Rain也禮尚往來，帶超儀品嚐正宗韓菜。
《逃》劇自播出後收視不俗，超儀參演也受韓國傳媒關注，並以清純來形容她，超儀昨在電話中說：「清純？從來冇諗過喎，咁以後要好好喺呢方面發展吓喇。我知套劇喺韓國評價好，自己都好開心，本來劇組都有聯絡我去首爾做宣傳，但因為檔期問題去唔到。」
拍打戲被Rain撞跌
超儀又謂難忘與Rain拍打戲，當日她腳踏私伙的ChristianLouboutin5吋高跟鞋上陣，拍動作戲時被Rain不慎撞跌，她憶述說：「佢即刻扶住我，仲話好彩冇踩花我對鞋。其實我哋成班人都好有團隊精神，大家係惺惺相惜。」
採訪：葉雪