正當內地人享受史上最悠長嘅十．一長假，有基金教父之稱嘅David雷（雷賢達），就準備提前結束假期，返上海準備搏殺。David雷做乜咁搏？佢提醒華華，佢要返去上海做多一份工。
華華差啲唔記得，交銀施羅德喺上星期公佈有公募界嘅大佬莫泰山唔做總經理，轉做私募基金掌舵人。
不過，莫泰山唔係普通嘅基金經理，佢嘅背景絕對唔嘢小，佢做過中證監基金監管部副處長、辦公廳主席秘書、基金監管部處長，喺08年加盟交銀施羅德基金做總經理。
今次，佢仲帶埋銷售總監、專戶理財部總經理沈斌過檔。過去四年，交銀施羅德整體規模喺內地排10名內。家陣主帥離巢，對交銀施羅德唔多唔少都有啲影響啩？不過，有David雷坐鎮，唔使怕！
見慣風浪嘅David雷當然應付自如，只不過，佢喺未來90日內，要身兼兩職（副董事長與總經理），辛苦難免。
李華華