自食其力，豐衣足食，08年獲左派全力配票當選嘅梁美芬，兩年後未必可以添食，近日積極打好樁腳，拉攏區議員、地區人士加入西九新動力，試圖開拓票源。噚日介紹12張新面孔，多數係工程、測量界人士，西九舊區多重建項目，梁美芬搵專業人士落區，各取所需。
梁美芬指專業人士走入群眾係時代趨勢，所以好鼓勵專業人士以專業知識協助推動社區工作，佢坦言鼓勵有志服務社區嘅會員參加明年區議會選舉，「更好地服務社群」。
西九新動力現有約30個區議員，部份係委任議員，出年派幾多人出選係未知之數，事關民建聯已佈好局，冇乜興趣協調，八方聽聞中聯辦都冇乜意欲插手。