少年輕狂都試過不羈，但知錯能改，善莫大焉，唔錯過又被懲罰過受到教訓，又點會真正領略到甚麼是對、甚麼是錯。記得讀幼稚園時忘記叫阿爸簽手冊，怕俾老師罰索性冒老竇簽名，誰不知一嘢就俾老師踢爆，結果罰得更重，被關入俗稱「黑房」嘅廁所，家講返都仲記憶猶新。假如今日仲有老師咁樣教訓學生，肯定會俾怪獸家長報警控告虐兒，但自此之後，我真係冇再犯上同一個錯誤。
以前讀書鼓勵背誦，學校測驗，以米雕工藝抄低關鍵字句程式出貓嘅大有人在，我都試過，當然，上得山多終遇虎，可惜報應嚟得遲，大學畢業試俾教授眼利到，結果罰重考所有科目，連冇出貓嗰幾科都遭殃。好衰唔衰，重考成績仲要唔係咁差，真係悔不當初點解要靠旁門左道咁唔正路。
每個人一生中總會犯錯，只要明白對錯避免再犯就係進步。但係好似細路仔鍾意玩火，家長同政府每逢中秋都會呼籲切勿煲蠟，可惜又年年都有細路出事，係唔係火唔燒到手就真係唔知痛呢？
涉利益衝突要早響
包括銀行、保險、基金、證券嘅金融業，絕對係受到高度監管（HighlyRegulated）嘅行業，懂業務之餘都要熟讀規例，知道咩叫Integrity及BestPractice。有啲可以避免俾人入到你位嘅就適宜盡量閃避，費事瓜田李下，有前冇後甩甩漏漏好易出事，總之坦白從寬，有咩可能發生利益衝突嘅地方就應該自行早響，自願申報就唔會慘被開名啦！
今日晏晝連喺Starbucks借個地方趕稿，都聽到背後俾人閒言閒語，呢次真係白狗當災，被一竹篙打殘。唏，咁星光熠熠嘅股票唔升都冇天理啦！可惜全程我都冇參與亦冇份攞貨或認購過新股王，唯一要申報嘅，係前晚上市慶功戥人開心時，抽到個現金獎1,682蚊！
胡孟青
作者為獨立股評人