甚麼是RFID（無線射頻識別）？如果不以八達通做例子，實在難以說明這種非接觸式的自動識別技術是甚麼。而在「嘟一嘟」科技尚未在港普及時，暗地已經有五位年輕人對RFID情有獨鍾，組成了相信是全港獨一無二的「RFID特別興趣小組」，一人一部手提電腦，穿梭各大學圖書館鑽研RFID的應用潛力，結果這個興趣小組，竟變成賺錢的科研公司，上海世博香港館內的智能手帶就是這班「嘟嘟男」的力作。
研究無線射頻識別
「我哋02、03年成立呢個興趣小組時，完全冇諗住做生意，一心只諗住點樣先可以令大家好穩陣咁畢到業」。香港射頻公司營運總監馮萃熙是RFID特別興趣小組創立人之一，當年他是理工大學系統工程研究生，因緣際會遇上其他四位來自本港不同院校以及修讀不同學科的無線射頻識別狂迷。五位本地薑一拍即合，「大家都好在意，究竟呢樣科技有乜發展空間？當時啱啱興起嘅八達通係低頻喎，咁超高頻有乜可以做呢？傾吓傾吓就成立咗小組」。
別以為只是興趣小組組織很鬆散，馮萃熙說他們非常有紀律，每星期聚會一次，輪流到各大學打躉，「大家一人捧住一部notebook，鬼鬼祟祟咁入去個圖書館或者canteen傾」。這個本來只屬課餘活動性質的小組，後來研發了首個新式RFID閱讀器模組，更在學術期刊發表，出乎意料地收到外國公司定單，「有個海外客戶話想買幾個模組，我哋先至發現小組除咗為興趣，原來有商業價值，可以成立公司喎」。
忽然創業，幾個小伙子戰戰兢兢，馮萃熙說：「嗰時好緊張，好似張商業登記證，董事要填登記地址，但我同屋企人住，點算？咁如果最終資金冇晒又損手爛腳，會唔會有人敲我哋屋企道門呢？張invoice咁多嘢，如果符合唔到其中一項，會唔會被拉人封舖o架？」
開了公司，如何做生意是更大問題，「好多客都會問我哋：你間公司成立冇幾耐喎，幫緊邊間機構做嘢？有乜產品？好多時我哋都答唔到，嗰時個心好怯」。要贏人先要贏自己，與其不時被問到「口啞啞」，當時仍為研究生的馮萃熙靈機一觸，以學生身份致電大機構，「試過話畀佢哋聽，我哋嘅研究去到某個階段，想請人上嚟問返啲嘢，然後我將抄低唔識答嘅問題問返佢，睇吓人哋點答，乘機偷師」。
搞公司進駐科學園
馮萃熙與他的RFID之友在05年透過科培計劃進駐科學園，由網上虛擬辦公室，變成實實在在的工作間。萬事起頭難，創業之初幾乎斷六親，「我哋當時連農曆年都開會，全年無休；朋友見少咗好多啦，連屋企做節都唔返去o架」。顛倒日與夜的科學園生活有苦有樂，「呢度每晚都總有兩、三戶公司通緊頂，離遠見到人哋都着咗燈，就算大家行過時唔會開口話我好支持你，但都會會心微笑，好感動會有咁多人喺度為科研而埋首苦幹」。
06年初公司終於推出第一代新研製的RFID標籤，廣為珠寶商應用，目前系統已經開發至第十代。最近世博香港館的「城市最佳實踐區」，也用上了其公司研發的智能手帶系統，參觀人士只要將智能手帶向電子屏幕嘟一嘟，便可即時啟動館內互動遊戲及展覽，連到訪的政務司司長唐英年也玩得相當投入。有誰料到當日那個興趣小組，竟無心插柳成就一個本地科研童話。
記者 許偉賢