以前，一家大細看電影是大事，戲院經理則要照顧戲院大小事，他最後一個下班鎖門、要維持排隊秩序、監管清潔、要想辦法阻擋陀地滋擾。迷你戲院出現，電腦化換來人味淡薄，不但取消銀幕前的布簾，也淘汰老一輩的戲院人。
記者：林佩婷
攝影：梁細權、黃子偉、陳陶鈞、部份相片由受訪者提供
場地提供：apm（22670500）
少人看午夜場
據了解，香港1907年便出現定期播放電影的戲院，1941年香港有27間戲院，踏入電影業最發達的五六十年代，港九新界戲院更是多不勝數。新寶院線老闆陳榮美，小時候落戲院幫手畫票，一日看兩部電影等閒事，「有興趣就一啲都唔覺辛苦，家人做開戲院，自己自然繼續做落去，當年幾好做，新藝城嘅戲比較收得。」舊式戲院除普通座外還有超等，旗下的豪華戲院兩院各有960個座位，現在看來超大，不過和以前動輒過千座位比只算小規模，新式迷你戲院得百多個位就更加無得比。他認為八十年代是電影業最輝煌時代，「嗰陣仲未有咁多影碟或娛樂，大部份人都會選擇睇戲，幾乎日日滿座。」
最高峯時期，他旗下有廿四間戲院，大部份都是自家地皮的物業，不過自1995年起，戲院生意大不如前，入座率長跌，現今只剩下銅鑼灣總統戲院、旺角新寶戲院、旺角豪華戲院和屯門凱都戲院。「家資訊發達，娛樂多好多，以前好多酒樓夥計收工會睇午夜場，大陸開放後，佢哋同年輕人寧願返內地消費，搞到家午夜場都少咗人睇，當然，翻版同樣有影響。」要營運戲院不易，多年衰退也令他開始意興闌珊，「好彩全部都係自己地，蝕少少都可以做落去，家興趣無咁大，剩番幾多間戲院無所謂，豪華戲院等到適當時候，都可能會拆。」
戲院拆卸即退休
老闆與員工一起大嘆生意難撈，豪華戲院經理符氣堯，在業界打滾四十多年，由帶位做到經理級，「我1968年讀完會計，去總統戲院做帶位，嗰陣好旺日子好易過，但帶位當更最辛苦，要企喺度睇住個場。九個月後，我去銅鑼灣豪華戲院做票務，日日有人排隊買飛，收工仲要計數，1971年到百樂做司理，管晒成間戲院，工作範圍包括維持排隊秩序、監管清潔、收工我行最尾因為要鎖門，如果有陀地滋擾，仲要諗辦法擺平。」之後他做過新都、快樂、金聲和現在的豪華戲院，絕對是老前輩。「以前啲戲院好似百樂、新寶、豪華咁，大部份連地一間間起，或利用『通天位』起戲院，即係用大廈旁邊本來留空嘅天井位，金聲、凱都係類似例子。戲院分樓上樓下，有超等位，以前普通位$1.2，超等$2.4，銅鑼灣豪華戲院最有氣派，下面入口有柚木裝飾，羅馬式裝修好靚。」
1991年旺角豪華戲院開幕，初初入座率很理想，可惜到1997年符生入職時已變差，即使有平價早場、$30戲票等措拖仍未能救亡，他歸納兩大衰退原因：「1997年每場戲都有二三百觀眾，??家每場戲得幾十人，除非周星馳啲戲先有幾百人睇。新戲院乜都新，舊戲院裝修要一大筆錢，一張凳最平千二蚊，豪華兩院成二千個座位，點換？其次，戲院位置唔多好，即使喺旺角，都好少人肯行過嚟。迷你戲院開喺商場裏面，十幾人到商場消費，大家唔睇戲可以行街打機，再約幾點喺商場集合，位置又近地鐵，打風落雨都唔怕。有晒天時地利，豪華點執都無用，等戲院拆咗之後，我就退休。
排隊排到出碼頭
1969年海運戲院開幕，當年一千七百個座位分堂座、超等，很豪華。
1984年開始做帶位現為當值經理的王俠，還記得當年盛況，「以前規定戲院之上唔可以再起樓起商場，我覺得除咗碧麗宮，當年海運戲院都算豪華，當時廣東道有條電梯行過海運，超等位又有條電梯，上到樓上Lobby可以休息，好多名人好似鄧肇堅，成日都嚟睇戲，散場嗰陣會先疏散超等客人，最記得上映《E.T外星人》，排隊排到出碼頭。」1985年開始，入座率回落，加上國際電影公司如環球、派拉蒙等撤走香港，令市道變差，為救市，海運亦有播《碧麗莎的情人》、《感官世界》等藝術三級片，1990年市道轉好，《人鬼情未了》、《風月俏佳人》又再掀起電影熱，至1993年因租約關係，縮減戲院面積，將原來堂座取消，變成現在的576個座位，2000年再用千萬裝修，座椅、音響、銀幕全部更換。集團影院部營運總監Raymond說：「八幾年真係日日排長龍，場場爆滿，1998年後因翻版、迷你戲院出現，受到衝擊，所以又再裝修一次，家周末都維持到八成入座率，不過始終得單一院線，片源選擇少，往往第二星期入座率就會下降。除影片外，亦曾搞過3D世界盃，未來希望搞多啲唔同類型活動，加強競爭力。」
戲迷寫《戲院誌》
若戲迷有上網找資料習慣，必看過黃夏柏寫的網誌《戲院誌》。
他是超級電影迷，平均每星期看兩套電影，九十年代去外國旅行看電影，見當地戲院好懷舊，遂開始留意香港戲院設計，2006開始決定以戲院為題寫網誌。他認為每間舊戲院都有特色：「以前啲戲院係獨立建築，係一條街內裏面嘅重要部份，設計空間感大，裝修花心思唔會吝嗇空間，二樓有休息地方，天花又高又大，第一排座位同銀幕隔一段距離；家啲迷你戲院要盡量慳地方，大堂有咁細得咁細，就連出口燈光牌啲燈都射到銀幕，好滋擾。」他對三間戲院印象最深刻：「以前我住澳門，電視成日直播利舞臺戲院啲選美活動，直至親眼見到，真係覺得好古色古香，係個愉快經驗。其次係海運戲院，環境大，座位同銀幕夠闊，樓上樓下空間感十足，最記得散場嗰陣，戲院落幕打燈嘅感覺好靚。最後一間係灣仔新華戲院，可以話係第一間藝術戲院，佢專放映獨立或比較特別嘅電影，不過佢用商廈地舖建成，坐得唔多舒服，但頭幾年真係打理得好好。」
有些電影迷死忠於某間舊戲院，他比較理性，認為時代轉變無可厚非，迷你戲院都有其好處。「戲院未必一定大就好，好似大華戲院，嗰陣得400幾個座位，整體感覺唔錯。舊戲院座位其實有啲窄，家啲凳鬆動同舒服好多，一個城市唔一定只鍾意舊嘢，多啲選擇會更好，不過當然有價值嘅就要保留，好似倫敦、紐約等地，舊戲院可以並存。」
