前高官陳太噚日現身孖生細妹方寧生新開張高級歐洲傢俬舖開幕酒會，新舖佔地成萬呎，件件傢俬都係豪宅級陳設，最低消費五位數字，普通擺設幾千蚊，顧客非富則貴。八方聽聞內地大款幫襯都唔少，事關佢哋喺香港買咗大屋，冇理由擺啲國貨入去，當然買歐洲產品。
麻雀枱連凳售108000元
全店最貴係一張紫石枱面梳妝枱，全人手造，矜貴在紫色枱面，盛惠13萬元。至於方寧生喺意大利特別訂做嘅麻雀枱，連埋四張凳賣108,000元，總共訂製四張返港，家陣剩番一張待售。打牌時容易肉緊，可能會大力拍隻麻雀落枱，怕唔怕整花張枱呢？陳太話自己打牌時好悠閒，唔會大力拍隻麻雀牌。
打理舖頭嘅方寧生女兒陸介琳心水推介係名為BOOK嘅書枱，外形好似本書咁，放在書房即時提升書卷味，陸介琳話張枱係按照90年前古法造成，所有榫位人手製造，特色係好多抽屜同暗格，因為以前冇咁多銀行保險箱，富豪在家收埋貴重物品，就要收埋喺暗格。