無綫劇集《公主嫁到》成為今年收視冠軍，周日結局收視平均有42點，吸引咗268萬人觀看，加埋大結局嗰晚網上有60萬（9點）觀眾支持，有成328萬觀眾，一眾演員噚日喺將軍澳電視廣播城開香檳慶祝，個個都話想開續集，佘詩曼做刁蠻公主過足癮，想再繼續拍喜劇，李香琴為咗同大家合作仲話永不言休，仲即場叫監製梅小青預留角色畀佢。
琴姐想以身相許
其間演員繼續以爛gag搞笑，李香琴重提拍劇時大家點對佢，仲話：「當時個個對我斟茶遞水服侍周到，無以為報，以前就興以身相許，家……」阮兆祥好鬼馬笑笑口接住話：「家都得，我最鍾意有經驗。」陳豪就揚言開續集事在必行，只係睇《宮心計》定係《公主嫁到》先，最好做個民意調查喎！
阿佘就覺得兩套都好難揀，不過佢個人意願就想開喜劇，佢話：「如果《公》劇再開，我就已經冇之前咁刁蠻，冇咗呢種特質，唔夠搞笑，但《宮》劇就可以調去做奸角，仲有發揮。」阿佘又好期待鄧萃雯同黎耀祥主演嘅《巾幗梟雄2》，睇嚟年尾無綫頒獎禮都係雯女同阿佘之爭，阿佘話：「唔可以咁講，隨緣。」
