踏入10月萬聖節，周圍都鬼聲鬼氣，小妹都想化個鬼樣嚇吓人，但唔想咁例牌又係啲女巫、吸血鬼造型。港鐵德福廣場嘅公關Yan噚日同小妹報料，唔想個鬼樣咁行貨，做吓善事乜鬼樣都做得，因商場搵咗荷李活電影特技化妝大師兼艾美獎大獎得主ThomSurprenant嚟港，親自操刀為善心人化妝。
大師代化鬼妝
阿Yan話，Thom有20年特技化妝經驗，曾先後參加多部荷李活A級電影嘅特技化妝工作，包括《星空奇遇記》、《變種特攻》、《蝙蝠俠不敗之謎》等，95年憑《星空奇遇記》奪得艾美獎。
呢個月16日到31日，商場展出Thom經典作品，當中唔少得《星球大戰》尤達大師、《魔戒》半獸人、《星空奇遇記》波格人等，總值超過30萬元。顧客喺10日至26日期間參加《荷里活特技化妝全接觸》慈善競投，最高慈善競投價嘅4位大慈善家，獲Thom設計出與眾不同嘅特技化妝造型，出席萬聖節派對仲唔贏晒。Thom嘅高徒Elaw喺29日至31日會長駐德福廣場，同大家打造今年最新的萬聖節造型化妝，捐$50畀聯合國兒童基金會就可以免費化妝。
除咗德福，旺角新世紀廣場都搞咗《娃鬼餐廳》鬼屋，喺10月萬聖節期間提供多款《新奇屍房菜》，保證食客食到嘔；愉景灣廣場都唔執輸，10月30日至31日晚舉行古靈精怪嘉年華，每個角落都有鬼恭候，唔嚇死都得番半條人命。
電郵：mailto:[email protected]