你有冇諗過，你有一日走去神聖嘅教堂，本來諗住聽吓聖經，望吓彌撒，洗滌下心靈之餘，再做番小小捐獻貢獻吓社會。點知一拎錢出嚟，個牧師竟然笑吟吟叫你過去，話有好嘢益你，你心諗有「so」就跟咗佢去，結果竟然見到賭枱，同其他教友賭到不亦樂乎，齊齊輸晒副身家呢？
華華講緊嘅絕對唔係乜嘢新騙案手法，而係股神畢菲特講嘅一個生鬼啜核嘅比喻。佢話華爾街大行係「教堂開賭場，牧師也瘋狂」。股神嚟一招先讚後彈，讚啲華爾街大行本來好似教堂咁，對社會經濟有貢獻，之不過有時候會出吓蠱惑，聚眾開賭賺吓外快，咁就出事嘞！
話「牧師」賭出大頭佛
股神仲話，雖則每個人天生都鍾意賭錢，貪錢搵錢夠方便嘛！但弊就弊在班「牧師」賭性大發唔曉收手，有金融十誡唔跟，仲要狼到用啲衍生工具，將間賭場發大嚟搞，最終賭出個大頭佛，搞到教堂變咗大家輸身家嘅地方！搞成咁，班「牧師」應該要負責。
股神對於「薯仔」時代對有錢佬嘅免稅政策亦都唔係好鍾意，認為呢啲政策係時候光榮引退，因為佢思疑自己交緊嘅稅率，分分鐘可能仲低過班清潔女工，如果真係咁，就真係對社會唔係幾公平喎。
李華華
mailto:[email protected]