雖然話港島豪宅矜貴，但九龍嘅飛鵝山都唔輸蝕，唔少富豪商賈都鍾情喺飛鵝山置業。好似思捷前主席邢李㷧，豪擲約2.6億，買咗立法會議員葉劉淑儀曾經住過嘅飛鵝山大屋。邢生過往都買賣過唔少豪宅，通常用海外註冊公司買入，山頂白加道23號分層豪宅就係用海外註冊公司買，甚少用私人名義入貨。不過，佢87年用785萬元買入嘅飛鵝山道8號就例外，當年邢李㷧用個人名義買入後，翌年將物業轉由一間海外註冊公司持有。
2.6億元成交
葉劉夫家家族嘅大宅，位處飛鵝山嵐霞路，地勢高，可以俯瞰整個九龍半島，有無敵維港景。地產經紀指葉家大宅景觀係飛鵝山成個山頭數一數二，同邢李㷧持有嘅飛鵝山道8號前望順緻苑屋頂嘅「樓景」比較，顯然優質好多。市場人士早前估計大屋地皮值3億元至4億元，最終2.6億元成交，邢李㷧唔知算唔算執到筍貨。
今次大宅交易，據講由葉家方面負責，葉劉無過問，由於地皮限建一間大屋，家族成員現時唔啱用，所以善價而沽。持有大宅嘅正興建築有限公司，葉劉佔一成股權，賣屋後大約分到2,600萬元。呢間大屋係葉劉同丈夫結婚後愛巢，由81年住到99年，大屋8月標售後，葉劉特別重遊舊地，影相留念。
飛鵝山風水好
據葉劉講，大屋面積有成萬呎，花園佔地5萬呎，佢鍾意飛鵝山人煙少、空氣清新兼風水好。事實上佢住上山後官運亨通，步步高陞至保安局局長。之不過住大屋唔係想像中咁有趣嘅事，始終係郊外地方，葉劉話蛇蟲鼠蟻入侵少不免，有時會冇水鬧水荒，有時又水頭多得滯水浸，山泥傾瀉同山火等意外都經歷過，連竊匪、偷渡客都曾經係「訪客」，不過大屋始終係10幾年嚟佢照顧丈夫同養育女兒嘅家園，因此間屋對佢有重大意義。
家大屋易手，住在飛鵝山家庭樂時光，變成葉劉腦海回憶，佢估計新買家好快會將間屋拆卸重建，飛鵝山頭碩果僅存古老大宅成為歷史。
mailto:[email protected]