前晚花旗股市跌78點收市，但冇影響大局，道指會伺機試11000關。港股累積升咗唔少，好多人睇要調整，噚日開市順應要求，低開近90點，不過反反覆覆之後，反升20點收市，報22639，如果大家仔細留意，近日港股「引淡倉」嘅味道其實好濃。
現貨方面，大戶睇嚟都係收貨格，一破23000，估計好多大藍籌都會絕塵而去。
光控C輪23785：光大控股（165）噚日報收19.38元，升2.2%。股價由9月初至前日都喺窄幅橫行，橫行區咁啱又係短中長期平均線嘅密集區，呢兩日異動推高，成交大增，噚日破關而上，後市上試22元嘅機會好大，可以諗吓隻C輪23785。
隻輪現價12.5仙，2011年2月25日到期，行使價22元，溢價20%，引伸波幅44.7%，槓桿率15.5倍（有效5.9倍），正股見22元，23785睇24.8仙，有近99%升幅，正股跌穿18.50元就沽咗隻輪。
俊樺