醫院管理局要搵總裁接替返澳洲嘅蘇利民，遴選委員會噚日同最後兩強梁栢賢、張偉麟面試，兩個現任醫管局高層旗鼓相當，鬥到最後未分高下，八方收到風，遴選委員會暫時仍然難作決定，要再研究研究，呢個星期都未必有結果。
八方聽聞噚日面試時，大家係飲住咖啡傾閒偈，務求營造一個輕鬆氣氛同環境，俾兩個候選人暢所欲言，同遴選委員真情對話。雖然蘇利民就嚟返澳洲，醫管局都唔想再拖，希望噚日進行第二輪面試後就有決定，可是張、梁兩人實在旗鼓相當，各有優勢。
梁栢賢同政府部門關係密切，由衞生署過檔三年表現卓越；張醫生對醫管局功勞不少，對服務規劃同醫管局人事都好熟悉，得到委員同部份聯網總監支持，揀邊個好呢？今次真係考起遴選委員會成員。