哈化柏林前晚喺德乙主場打和亞琛0:0，以7戰17分續做1哥，1分領先格雷特霍夫及奧厄。淨係睇賽果，場波應該冇乜特別，但查實有令球迷O嘴嘅場面，事關哈化中場尼美亞無端白事做咗灰太狼，喺比賽途中送咗隻德國鹹豬手畀金髮靚女球證施汀侯絲食，好彩施汀侯絲能夠冷靜處理，呢單疑似非禮事件先至收到科。
突遭拍胸部3秒
話說場波打到54分31秒嘅時候，電視鏡頭影到哈化中場尼美亞，突然向企喺佢右邊嘅31歲女球證施汀侯絲出鹹豬手，隻右手係咁拍落對方嘅左胸度，仲拍打咗成3秒咁耐。施汀侯絲察覺俾人胸襲後立即閃開，仲用左手摸摸自己個心口，然後怒睥尼美亞，再質問佢做乜胸襲佢。尼美亞喺呢個時候，似乎知道自己做錯事，於是猛咁同施汀侯絲解釋。施汀侯絲亦接受佢嘅解釋，向佢報以一個微笑，令呢單疑似非禮事件告一段落。
由雲達不來梅以借將身份為哈化效力嘅中場尼美亞，事後接受訪問時話：「當時我以為佢離我遠。我亦冇心拍佢個胸。」哈化教練巴布亦相信尼美亞係清白，佢話：「對於嗰啲下流嘅人嚟講，或者會覺得呢個場面喺整場波至正嘅。」
睇番德國報章cap出嚟嘅電視畫面，當時尼美亞個人向後行，對眼就向前望，似乎真係睇唔到施汀侯絲企得咁近佢；更何況，球員喺場上為咗爭位而向對手毛手毛腳係好平常嘅事，佢應該係當咗施汀侯絲係亞琛球員，先至出隻右手係咁拍。曾經喺德甲（07/08球季多蒙特主勝雲達不來梅3:0）做過第4球證嘅施汀侯絲，冇對事件作任何評論，不過佢就話滿意自己嘅表現。
蝕底唔怕微笑掛面
德國傳媒事後大讚施汀侯絲當時嘅表現，話佢雖然係蝕底咗，不過仲好冷靜，喺質問尼美亞嘅時候仲識得面帶微笑，而且頭尾用4秒時間就解決咗事件，證明佢有能力應付突發事件。我求大俠都起咗佢底，知佢由07/08球季開始喺德乙執法，亦吹過今夏嘅女子世青盃，經驗真係唔需要懷疑，所以第日分分鐘見到佢喺德甲做球證都未定。