政府新聞處網頁噚日改版，八方都算係用家之一，覺得新版面設計比之前清晰有條理，而為配合新世代記者或用家，新聞處5月喺YouTube開設頻道，已上載咗近400條短片，7月喺Twitter同新浪微博開戶口，發放政府新聞及訊息。
新聞處仲有個追上時代新猷，就係出埋iPhone應用程式，下載Apps後，可以更方便瀏覽新聞處資訊同短片，美中不足係暫未有iPad版。據政府內部統計，新聞處網頁瀏覽率在眾政府部門中位列亞軍，首位係天文台，第三位係勞工處互動搵工網頁，為咗令內容更有睇頭，新聞處請咗個資深傳媒人做網站編輯，以該處每年開支逾3.7億元計，咁多新搞作，都係濕濕碎嘅使費啫。