拍名牌內衣褲廣告絕對唔係C朗同中田英壽呢啲世界級球星嘅專利，本地南華球員陳肇麒（陳七）同文彼得畀內衣品牌Jockey中，搵佢哋成為全新運動系列內褲嘅香港區代言人。佢哋兩個仲獻出人生嘅第一次，淨係着住條內褲半裸咁拍廣告，盡情散發懾人的男人魅力。但噚日記者會上，佢哋冇即場行catwalk，show吓quali噃。見慣大場面嘅陳七怕醜咁話：「吓……我驚我唔識行咋，啲model會pro（專業）啲！」
陳七同文彼得第一次拍內褲廣告，兩個都話有少少尷尬同緊張，但陳七就話最緊要係效果好。咁大犧牲，酬勞又如何呢？佢哋笑住話合理啦！文彼得噚日仲即場爆陳七，話佢收過女友送嘅貼身內褲，陳七就死撐話「講笑啫！」仲話如果收最想收到係鮮綠色，女士們注意嘞！