呢個月底係哈囉喂，咁啱廣管局噚日公佈，亞視國際台喺今年6月7日晚9點播放嘅恐怖電影《娃鬼怪嬰》（SeedofChucky），俾四名觀眾投訴內容有惡心、暴力、令人討厭嘅血腥同露骨性愛描繪，唔應該喺細路仔仲睇電視嘅時間播出。
廣管局話套戲係暴力恐怖片，即使被列為「家長指引」類別，都唔適合喺晚上9點半前播出，所以裁定投訴成立，向亞視發出警告。
投訴港姐候選人
另外又有八名聽眾投訴商台獲民建聯贊助嘅《十八仝人愛落區》第三至六集，廣管局認為有關投訴同頭兩集差唔多，由於商台已被罰3萬元，因此毋須再發出另一項懲處。
另外影視處喺8月裁定亞視同商台新聞報道，三宗資料不正確投訴成立，裁定為輕微違規。同期又處理有人不滿有線世界盃節目出現「超錯」口號，六人投訴港姐候選佳麗個樣令人厭惡，又有人不滿無綫互動新聞台天氣報告一名記者外表及語調令人不悅，但呢啲都唔受廣管理條例管理，影視處冇法作裁決。