好多人覺得藝術節離自己好遠，其實這麼遠，那麼近，好似大家都可能聽過英文歌《AsTearsGoBy》，呢首滾石名曲60年代女歌手MarianneFaithfull都唱過，呢位62歲diva仲好勁，係英國流行音樂雜誌《Q》嘅年度Icon。喺YouTube見到佢1965年唱《AsTearsGoBy》好清純，今日喺紅塵裏翻滾過，肯定更有味道，唔信可以喺2011香港藝術節睇吓佢嘅風采。
大型戶外聲光裝置
仲覺得好遠，可以留意吓明年2月17日至3月27日舉行嘅香港藝術節，其中一個由藝術節促成嘅青春音樂劇《水滸108忠義堂》，集合兩岸三地勁人，包括香港出身嘅歌手周華健、台灣跨媒體創作人吳興國、台灣才子張大春，仲有上海戲劇學院戲曲學院精英，佢哋用最「潮」角度演繹《水滸傳》故事，仲會一人分飾多角。
總開支9,700萬元嘅藝術節今次再走入群眾，喺九龍寨城公園搞咗個大型戶外聲光裝置《聲光園》，走入去會感受到不同光影同聲音效果。
梗係仲有殿堂級表演，包括首次嚟港嘅紐約市芭蕾舞團、柏林劇團，大家唔使環遊世界，一次過睇晒。而烏珀塔爾舞蹈劇場就重臨本地，仲用表演《康乃馨》緬懷剛離世嘅舞蹈大師翩娜．包殊。本地樂團就有香港管弦樂團、香港小交響樂團、中樂團等。大家有興趣可以去 http://www.hk.artsfestival.org，睇睇節目詳情。
電郵：mailto:[email protected]