向來外表斯文的LEXUSIS250，2010年Facelift版突然惡了很多，鮮藍車身、碳灰18吋輪圈、頭尾新擾流，都不經意地宣示戰意。這套火辣新裝是新版本IS250F-Sport獨有，LEXUS於中價豪房市場站穩陣腳時，亦是時候加個兄弟陣容，搶攻Sport車系市場。
記者：許維雅
攝影：陳陶鈞
Model：Vibeke@GME
獨家Options添跑味
向來感覺劈得的中價豪華房車，LEXUSIS250屬其中一員，打好根基後，邁向歐洲車系領域的第二步，自然是開拓Sport版車系，好似BMW有MSport、平治有AMGSportpack一樣，LEXUS就為IS車系推出IS250F-Sport版本，可以話是小試牛刀的第一步。
打造一部辣味更濃的動感房車，頭尾擾流是最重要一環。霧燈下加強了兩側鰓骨立體形態的車頭擾流，配合加上LED燈眼線點綴的全新頭燈、F-Sport獨有的菱形格仔鬼面罩，令IS250的車頭面貌頓時添上了幾分野性。再為車尾加上一隻小尾翼，帶來車頭更貼地、車尾更仰天的視覺效果。
跑化漸進的第二步當然是四隻鞋仔，換上F-Sport獨有碳灰色18吋五輻式雙間合金輪圈、同樣屬F-Sport獨家的BlueMetallic車身顏色，效果恰如其分。加上車側指揮燈下的方形徽章，F-Sport版絕對交足功課。
懸掛添路面感
想再攞高分些，內櫳亦有不少F-Sport獨有的Options配合房跑型格，特意配上連頂全黑內櫳經已夠Cool，Semi-aniline黑色真皮透氣跑車桶椅、金屬油門腳踏、F-Sport徽章的透氣孔紋真皮軚環及波棍等，都令斯文房車更顯跑化型格。
雖然力量輸出不變，沿用舊有2.5公升V6引擎，但就換上F-Sport獨有的懸掛系統及前後通風煞車碟，將行車性能更貼合房跑車所需。試過高速入彎、飆大直路，操控感覺都保持凌志一貫的穩定舒適，更改懸掛後的最明顯分別，絕對是更強的路面感。
F-Sport是否攞滿分？未必呢！有人會話19吋軨加兩側大包圍才夠完美，不過揀得房跑款式的車主，低調中帶點Sport味才是那杯茶，太招搖變了飛仔車反而影響IS車系味道。況且F-Sport版只是貴普通Ultimate版兩萬元，這套獨有Options絕對值回票價。
IS250F-Sport規格
引擎：2,500公升V6VVT-i
馬力：208PS/6,400rpm
扭力：252Nm/4,800rpm
傳動：六前速自動波連+/-後驅
售價：$439,770
查詢：25119430（凌志陳列室）