本地政壇元老鍾士元大Sir年逾90，幾年前退休後淡出政治圈，十分低調，罕有公開露面，亦絕口不談政治，佢「徒弟」李鵬飛講到口水乾，幾經游說，大Sir終於願意接受香港電台《議事論事》訪問，上鏡親述從政幾十年心路歷程。大Sir「政壇回憶錄」聽晚出街，八方打聽到部份絕密內容，涉及大Sir對一國兩制同政改方案嘅評價。
高度自治 得個講字
見證回歸，大Sir應該同好多人一齊嗌過香港明天會更好，講過一國兩制好成功，事到如今，大Sir有另一番睇法。飛哥問佢一國兩制可唔可以講得係成功落實，大Sir好坦白，話一國兩制是否成功，唔係咁簡單可以回答。
好多人可以隨口講出「一國兩制成功落實」、「香港高度自治」，喊政治口號易過食生菜，大Sir卻話有難度，因為要證明一國兩制成功，視乎中國政府有冇俾香港去決定自己嘅問題。咁中國政府有冇咁做呢？據知大Sir話喺政制方面，中國政府冇咁做，暗示所謂高度自治，其實得個講字。
政改方案喺北京接納民主黨提出嘅區議會方案後高票通過，好多人都形容係香港民主重要一步，成功「起錨」先至可以邁向真民主、真普選，據講大Sir唔係咁睇，佢話如果香港要有真民主，現時政制行唔通，必須要由香港人提出適合香港嘅方案，先至可以落實民主政制。「某人」早就講過高度自治唔係完全自治，政改唔俾阿爺話事，由香港人自己揸主意？好難喇！
公開政改談判內情
前任律政司司長梁愛詩被視為民主黨與北京之間「傳話人」，促成今次政改有功，八方聽聞大Sir喺鏡頭前，首次披露佢所知嘅一啲政改談判內情，至於大Sir如何左右大局，大家睇完節目後可以自行判斷。
飛哥訪問咗大Sir三小時，據知最少會剪輯成10集出街，由67年暴動講起，大Sir話當時香港立立亂，工商界擔心前途，開始參與政治，同現時商界只想食政治免費午餐被動心態好唔同，又會講被鬧漢奸、走狗嘅感受，回首往事，並不如煙。
mailto:[email protected]