國務院總理溫家寶歐洲行全球矚目，尤其係同日本首相嘅「走廊」外交更為一絕。港交所（388）主席夏佳理今日凌晨去歐洲，此行係去法國出席國際交易所聯會（WFE）年會會議，較早時有報章話，夏佳理係WFE新主席嘅大熱人選，但線人報料話佢實當選，只差程序。夏佳理做WFE新任主席，行政總裁李小加自然喺身邊。
夏佳理到法國前，先去意大利出席一個重要約會，就係見LV、Prada等歐洲名牌高層，向佢哋介紹香港有幾好，目的相信唔使華華多講，梗係希望多啲名牌嚟香港上市啦﹗其實，歐洲名牌L'OCCITANE（973）已經加入港交所大家庭，上市至今嘅股價仲升咗唔少，果真有食力，睇嚟夏佳理今次任務應該好輕鬆。
經紀：必有內地客捧場
華華嘅經紀朋友話，家歐洲經濟唔多正，歐洲名牌喺香港上市，除咗可以有唔錯嘅市盈率，上市後仲一定有內地客捧場，佢仲開玩笑講，屆時啲股票以實物寄發，話唔定變成內地客嘅收藏品，大家記住係收藏品唔係牆紙，雖則華華認為做牆上裝飾其實都唔錯。
李華華
mailto:[email protected]